कोल्हापूर - शिवाजी विद्यापीठाशी संलग्नित सर्व महाविद्यालये, मान्यता प्राप्त संस्थाचे प्राचार्य, प्राध्यापक, शिक्षकेत्तर अधिकारी आणि कर्मचारी,  अधिविभागांंचे विभाग प्रमुख, संचालक, समन्वयक, शिक्षक, सर्व प्रशासकीय अधिकारी, सेवक यांनी ‘कोरोना’ (कोव्हीड-१९) विरुद्धच्या लढाईसाठी एक दिवसाचे वेतन मदतीच्या स्वरुपात मुख्यमंत्री सहाय्यता निधीसाठी द्यावे, असे आवाहन विद्यापीठाचे कुलगुरू डॉ देवानंद शिंदे यांनी आज केले. त्याबाबतचे पत्रक प्रसिद्धीस देण्यात आले आहे.

डॉ. शिंदे म्हणाले, "आपला देश आणि राज्य सध्या कोव्हीड-१९ कोरोना व्हायरसच्या अत्यंत गंभीर अशा संकटातून जात आहे. भारत सरकार आणि महाराष्ट्र शासन कोरोना व्हायरसचा (कोव्हीड-१९) प्रकोप रोखण्याकरिता कठोर प्रयत्न करत आहेत. या कठीण प्रसंगी देशातील प्रत्येक नागरिकाचे कर्तव्य आहे की, आपण आपल्या देशासाठी मोलाचे योगदान दिले पाहिजे. याच भावनेतून आपण सर्वांनी मिळून आपले एक दिवसाचे वेतन मुख्यमंत्री सहाय्यता निधीकरिता देण्यात यावे." विद्यापीठाने विद्यापीठात शिव आपत्ती व्यवस्थापन व प्रशिक्षण केंद्र स्थापन करून वेगळ्या आपत्तीवर मात करण्यासाठी प्रशिक्षण देण्यासंदर्भात कार्यवाही सुरू केली आहे, असे त्यांनी स्पष्ट केले.

विद्यापीठ अनुदान आयोगाच्या निर्देशानुुसार  एक दिवसाचे वेतन देण्याबाबतही आवाहन केले आहे. तरी विद्यापीठाशी सर्व सबंधित घटकांनी एक दिवसाचे वेतन मदतीच्या स्वरुपात मुख्यमंत्री सहाय्यता निधीमध्ये द्यावे, असे आवाहनही त्यांनी केले.