कोल्हापूर - कोल्हापूर दक्षिणचे काँग्रेसचे आमदार ऋतुराज पाटील यांचा कोरोनाचा अहवाल शुक्रवारी (ता. २१) पॉझिटिव्ह आला असतानाच कोरोनाविरोधातील लढ्यात आघाडीवर असलेले काँग्रेसचे दुसरे आमदार चंद्रकांत जाधव यांचाही अहवाल पॉझिटिव्ह आला. श्री. जाधव यांनीच स्वतः ट्विट आणि सोशल मीडियावरून ही माहिती दिली असून संपर्कातील लोकांना तपासणी करून घेण्याचे आवाहन त्यांनी केले आहे.

शुक्रवारी दक्षिणचे आमदार श्री. पाटील यांचा अहवाल पॉझिटिव्ह आला होता. शहर आणि जिल्ह्यात कोरोनाचा समूह संसर्ग सुरू झाल्यापासून श्री. जाधव हेही शहरातील कोविड सेंटरमधील सुविधा, सीपीआरमधील डॉक्‍टरांबरोबरच रुग्णांना येणाऱ्या अडचणी, महापालिकेच्या नियोजनात आघाडीवर होते. स्वतःची काळजी घेत त्यांनी कोरोनाविरोधातील लढ्यात आघाडीची भूमिका घेतली होती. काही दिवसांपूर्वी जिल्हा परिषदेचे मुख्य कार्यकारी अधिकारी अमन मित्तल यांचा अहवाल पॉझिटिव्ह आला, त्यानंतर आमदार ऋतुराज पाटील यांचाही अहवाल पॉझिटिव्ह आला. दोघांच्या संपर्कात श्री. जाधव होते, त्यामुळे त्यांनीही तपासणी करून घेतली. त्यांच्यात कोरोनाची कोणतीही लक्षणे नाहीत; पण खबरदारी म्हणून त्यांनी दिलेल्या स्वॅबचा अहवाल सायंकाळी पॉझिटिव्ह आला. 

हे पण वाचा -  ते साठजण लढले आणि जिंकले सुध्दा !... पोलीस योद्धे पुन्हा सेवेत रुजु 

सोशल मीडियावर त्यांनी माहिती देताना आपला कोरोनाचा अहवाल पॉझिटिव्ह आला असून माझ्या संपर्कातील लोकांनी तपासणी करून घ्यावी, माझी प्रकृती ठणठणीत असल्याची माहिती दिली आहे. त्यानंतर त्यांच्या कुटुंबासह कारखान्यातील कामगारांचेही स्वॅब तपासणीसाठी घेतले आहेत. श्री. जाधव यांना तातडीने शास्त्रीनगर परिसरातील रुग्णालयात उपचारासाठी दाखल केले आहे.

हे पण वाचा -  कोल्हापुरात ई-पासची सक्ती कायम ; काय आहे कारण? 

संपादन- धनाजी सुर्वे