इचलकरंजी (कोल्हापूर) : व्हॉट्‌स ॲप स्टेटस्‌वर दहशत माजविण्याच्या दृष्टीने मजकूर ठेवल्याप्रकरणी पोलिस रेकॉर्डवरील गुन्हेगार आकाश वासुदेव (वय २७, रा. भोने माळ) याला पोलिसांनी अटक केली आहे. 

शिवाजीनगर पोलिसांचे गुन्हे शोध पथक व पोलिस उपअधीक्षक बी. बी. महामुनी यांच्या पथकाने ही कारवाई केली. न्यायालयाने त्याला १५ दिवस न्यायालयीन कोठडी सुनावली असून त्याची कारागृहात रवानगी करण्यात आली आहे. वासुदेव याच्यावर अनेक गंभीर गुन्हे नोंद आहेत.

हेही वाचा - महाराष्ट्रातील आणखी एका मोठ्या बँकेचा आरबीआयकडून परवाना रद्द, ठेवीदारांमध्ये अस्वस्थता -

वर्षभरापूर्वी ईदगाह मैदानाजवळ दीपक कोळेकर याचा वासुदेवसह त्याच्या टोळीने खून केला होता. यातील संशयित जामिनावर सुटले आहेत. काही दिवसांपूर्वी त्याच्यावर जर्मनी टोळीने सशस्त्र हल्ला केला होता, तर कोळेकर याच्या खुनाला एक वर्ष पूर्ण झाले असून, या पार्श्‍वभूमीवर वासुदेव याने मोबाईलमध्ये व्हॉट्‌स ॲप स्टेटस्‌वर ‘मर्डरचे एक वर्ष पूर्ण.. आता दुसऱ्या वादळाची तयारी’ असा दहशत माजविणारा मजकूर ठेवला होता. याची माहिती पोलिसांना मिळाली. त्यानुसार त्याच्याकडून गंभीर गुन्हा घडण्याची शक्‍यता असल्याने सोमवारी रात्री त्याला प्रतिबंधात्मक कारवाईखाली पोलिसांनी अटक केली. 
त्याला न्यायालयात हजर केले. न्यायालयाने त्याला १५ दिवसांची न्यायालयीन कोठडी सुनावली आहे. त्यामुळे त्याची रवानगी कारागृहात करण्यात आली आहे. 

"दहशत माजविणारा मजकूर मोबाईल स्टेटस्‌वर, फोटो, शस्त्राचे फोटो ठेवल्यास व सोशल मीडियावर व्हायरल केल्यास तत्काळ कठोर कारवाई करण्यात येईल."

- बी. बी. महामुनी, पोलिस उपअधीक्षक

हेही वाचा - ब्रेकिंग ; कळंबा कारागृहाच्या अधीक्षकांची तडकाफडकी बदली -

संपादन - स्नेहल कदम