कोल्हापूर: केंद्र सरकारने दिलेल्या सूचनेनुसार कोल्हापूर जिल्ह्यातील घाऊक, किरकोळ विक्रेते तसेच मिल धारकांनी तूर, मसूर, उडिद, चणा या डाळीचा साठा करू नये, असे आदेश जिल्हा पुरवठा अधिकारी दत्तात्रय कवितके यांनी दिले आहेत. डाळीवरील साठा निर्बंध 31 ऑक्टोंबर 2021 पर्यंत लागू राहणार आहे. 

श्री कवितके म्हणाले, केंद्र सरकारने 19 जुलैला दिलेल्या हा निर्बंध लागू केला आहे. साठा निर्बधामध्ये व्यापाऱ्याकडे एकाच प्रकारच्या डाळीचा 200 मेट्रीक टनापेक्षा जास्त साठा ठेवू नये. किरकोळ व्यापाऱ्याकडे कमाल 5 मेट्रीक टन असावा. मिलर्सकडे गेल्या 6 महिन्यातील असलेले उत्पादन किंवा वार्षिक स्थापित क्षमतेच्या 50 टक्के यामध्ये जे जास्त असेल ती कमाल साठा मर्यादा असेल. कायदेशीर घटकांकडे असणारा तूर, मसूर, उडिद , चणा या डाळीचा साठा 19 जुलै 2021 च्या अधिसूचनेतील साठा निर्बंधापेक्षा जास्त असल्यास तसे Fcainfoweb.nic.in या उपभोक्ता मामले विभागाच्या संकेतस्थळावर जाहिर केले आहे.

अतिरिक्त् डाळीचा साठा केंद्र अधिसूचनेपासून 30 दिवसाच्या आत ठरवून दिलेल्या साठयाच्या मर्यादेपर्यंत कमी करणे आवश्यक राहील. हे आदेश डाळीच्या आयातदारांना लागू असणार नाहीत. परंतु त्यांना त्याच्याकडे उपलब्ध असणा-या डाळीच्या साठयाची माहिती fcainfoweb.nic.in या उपभोक्ता मामले विभागाच्या संकेतस्थळावर जाहिर करणे बंधनकारक राहील. सर्व संबंधितांनी केंद्रशासनाच्या अधिसुचनेप्रमाणे सक्त अंमलबजावणी करावी. या तरतुदीचे उल्लंघन करणा-या व्यापा-याविरुध्द कडक कारवाई करण्यात येईल, असा ही इशारा कवितके यांनी दिला आहे.