शिरोली पुलाची (कोल्हापूर) : कोरोना विषाणूचा प्रादुर्भाव टाळण्यासाठी लॉकडाऊन असल्यामुळे राज्यातील सर्व प्रादेशिक आणि उपप्रादेशिक परिवहन कार्यालयांतील (आरटीओ) वाहन चालवण्याचे शिकाऊ व कायम परवाने देणे बंद आहे. या काळात कायम परवाना मुदतबाह्य झालेल्यांना सरकारने ३० जूनपर्यंत मुदतवाढ दिली आहे. शिकाऊ परवाना असलेल्यांबाबत कोणताही निर्णय झालेला नाही. त्यामुळे शिकाऊ परवानाधारकांना सरकारने वाऱ्यावर सोडल्याचे चित्र आहे. 

नागरिकांच्या सोयीसाठी मार्चच्या पहिल्या आठवड्यात परिवहन खात्याने मुदत संपणाऱ्या शिकाऊ आणि कायम परवाना धारकांच्या पूर्वीच्या ऑनलाईन अपॉईंटमेंटच्या तारखा रद्द करत  १ एप्रिल ही नवीन तारिख ठरवून दिली होती. परंतु संचारबंदी व नंतर टाळेबंदीनंतर आरटीओचे पूर्ण काम बंद झाले.  दरम्यान, कायम परवाना आणि व्यावसायिक वाहन चालवण्याच्या योग्यता प्रमाणपत्राची मुदत १ फेब्रुवारी ते ३० जून २०२० या काळात संपणाऱ्यांना दिलासा देत सगळ्यांना ३० जूनपर्यंत मुदतवाढ दिली गेली. परंतु  शिकाऊ परवान्यासाठी ऑनलाईन अपॉईंटमेंट घेणाऱ्या व मुदत संपणाऱ्याबद्दल अद्याप काही निर्णय घेण्यात आला नाही. त्यामुळे या सगळ्यांना पुन्हा सर्व प्रक्रिया नव्याने करण्याचा मनस्ताप सहन करावा लागू शकतो.

मुंबई वगळता राज्यभर रोज सुमारे २० हजार शिकाऊ परवाने काढले जातात. त्यासाठी उमेदवारांना ऑनलाईन अपॉईंटमेंट घेऊन वेळ आणि तारीखही निश्चित करावी लागते. तर कायम संवर्गातील रोज सुमारे १४ हजार परवाने दिले जातात.

‘‘लॉकडाऊनच्या काळात वाहन चालवण्याचा कायम परवाना आणि व्यावसायिक वाहनांच्या योग्यता प्रमाणपत्राची मुदत संपत असलेल्यांना ३० जून २०२० पर्यंत मुदतवाढ देण्यात आली आहे. सरकारचा हा निर्णय स्वागतार्ह व ट्रान्स्पोर्ट व्यावसायिकांना दिलासा देणार आहे.’’

-योगेश रेळेकर, कोल्हापूर उपजिल्हा प्रमुख महाराष्ट्र वाहतूक सेना

‘‘शिकाऊ परवान्यासाठी ऑनलाईन अपॉईंटमेंट घेऊन वेळ आणि तारीखही निश्चित करावी लागते. त्यामुळे लॉकडाऊनच्या काळात अपॉईंटमेंट असलेले आणि शिकाऊ परवानाधरकाबाबत सरकारने लवकर निर्णय घ्यावा.’’

-सचिन माने, रेणुकामाता मोटर ड्रायव्हिंग स्कूल, शिरोली पुलाची.

हे पण वाचा - गुड न्यूज ! ऊस तोड मजूर निघाले आपल्या गावा; पण कसे?

हे पण वाचा -  ...म्हणून चेंबरमध्ये अडकेलेल्या त्या दोघांना मिळाले जीवनदान......