कोल्हापूर ः कसबा बावडा येथील मराठा कॉलनीतील कोरोनाचा अहवाल यापूर्वी पॉझिटिव्ह आलेल्या महिलेचा 14 दिवसांनंतरचा दुसरा अहवाल आज निगेटिव्ह आल्याने या कॉलनीतील रहिवाशांनी सुटकेचा निःश्‍वास टाकला आहे. या महिलेसह तिच्या कुटुंबातील पाच जणांचाही अहवाल निगेटिव्ह आल्याने आता रहिवाशांना कॉलनीच्या प्रवेशद्वारावर लावलेले बॅरिकेड्‌स हटवून रस्ते कधी मोकळे होणार, याची प्रतीक्षा आहे. 
राज्यात आणि देशात लॉकडाउन असताना सातारा ते कोल्हापूर असा एका रुग्णवाहिकेतून प्रवास केलेल्या या 60 वर्षीय महिलेला सर्दी, ताप, खोकला अशी लक्षणे दिसू लागल्याने सेवा रुग्णालयात दाखल करण्यात आले होते. ही लक्षणे कोरोनाशी संबंधित असल्याने त्यांना 4 एप्रिलला सीपीआर रुग्णालयात दाखल करण्यात आले. त्याचदिवशी त्यांचा स्वॅब तपासणीसाठी पाठविला होता. 6 एप्रिलला या स्वॅबचा अहवाल पॉझिटिव्ह आल्यावर कसबा बावडा, लाईन बाजार परिसरात एकच खळबळ उडाली होती. 
14 दिवस ही महिला राहत असलेल्या परिसरातील रस्ते बॅरिकेड्‌स लावून बंद करण्यात आले आहेत. जीवनावश्‍यक वस्तू वगळता इतर काहीही या कॉलनीत दिले जात नाही आणि कॉलनीतील रहिवाशांना बाहेरही सोडले जात नाही. या महिलेचा पहिला अहवाल येऊन 14 दिवस झाल्यानंतर दुसऱ्या तपासणीसाठी दोन दिवसांपूर्वी तिचा स्वॅब मिरजेला तपासणीसाठी पाठविला होता. त्याचा अहवाल आज निगेटिव्ह आला. सोशल मीडियाद्वारे ही माहिती बावडा, मराठा कॉलनी, लाईन बाजार परिसरात समजताच या परिसरातील रहिवाशांनी सुटकेचा निःश्‍वास सोडला. 
कॉलनीत रुग्ण सापडल्याने या परिसरातील रस्ते गेल्या 14 दिवसांपासून पूर्ण "सील' करण्यात आले. या महिलेचा दुसरा अहवाल निगेटिव्ह आला आहे. तत्पूर्वीच तिच्या कुटुंबातीलही पाच जणांचा अहवाल निगेटिव्ह आला. त्यामुळे आता हे रस्ते खुले होण्याची प्रतीक्षा या परिसरातील नागरिकांना आहे.