हॉटेल मालकासह
कर्मचाऱ्यावर खुनाचा गुन्हा
संदीप लोखंडे मृत्यूप्रकरणी न्यायालयाचा आदेश
नागाव, ता. १५ : संदीप लोखंडे मृत्यूप्रकरणी हॉटेल मालक व कर्मचारी यांच्यावर खुनाचा गुन्हा दाखल झाला आहे. पुलाची शिरोली येथील हॉटेल प्रिन्सचे मालक विकास जाधव व तेथील वेटर बापू वाघी यांच्याविरोधात हा गुन्हा दाखल झाला आहे. न्यायालयाने तसे आदेश दिल्यामुळे हा गुन्हा दाखल करण्यात आला. शिवाय या गुन्ह्याचा तपासही करवीरचे उपविभागीय पोलिस अधिकारी सुजितकुमार शिरसागर यांच्याकडे देण्यात आला आहे.
याबाबत अधिक माहिती अशी, संदीप मारुती लोखंडे हा पुलाची शिरोली येथील हॉटेल प्रिन्समध्ये नोकरी करत होता. १० ऑगस्ट २०२३ रोजी पहाटे तो बाथरूमला गेला होता. तेथेच तो मयत झाला होता. याबाबत संदीपचा भाऊ सागर लोखंडे यांनी हा अपघाती मृत्यू नसून घातपात असण्याची शक्यता व्यक्त केली होती. मात्र संदीपला औषधे चालू असल्याने तो आजारी होता आणि त्यामुळेच बाथरूममध्ये पडल्याने त्याचा मृत्यू झाल्याचे त्यावेळी सांगण्यात आले होते. सागर लोखंडे यांनी याबाबत पोलिस दिशाभूल करत असल्याचे सांगत थेट न्यायालयात धाव घेतली. न्यायालयाने खुनाच्या गुन्हे अंतर्गत हॉटेल मालक व कर्मचारी यांच्यावर गुन्हा दाखल करण्याचे आदेश दिल्याने हा गुन्हा दाखल झाला आहे.