कोल्हापूर : सर्वांना अपेक्षित असलेली बातमी लवकरच येणार असल्याचे सांगत श्रीमंत शाहू छत्रपती महाराज (Shahu Chhatrapati Maharaj) यांनी आज लोकसभा निवडणुकीच्या (Loksabha Election) प्रचाराचे रणशिंगच फुंकले. निमित्त होते एका पुस्तक प्रकाशनाचे.

राजर्षी शाहू महाराज यांचे जन्मस्थळ असलेल्या ‘लक्ष्मी विलास’ पॅलेस परिसरात एका पुस्तकाचे प्रकाशन श्रीमंत शाहू महाराज यांच्या हस्ते झाले. या कार्यक्रमात त्यांनी निवडणूक लढवण्याचे संकेत तर दिलेच; पण थेट अपेक्षित बातमी लवकरच समजेल, असे सांगत प्रचारालाही सुरुवात केली.

कोल्हापूर लोकसभा मतदारसंघातून महाविकास आघाडीचे उमेदवार म्हणून श्रीमंत शाहू छत्रपती महाराज यांच्या नावाची चर्चा आहे. त्या पार्श्‍वभूमीवर त्यांनी केलेल्या विधानाला महत्त्व प्राप्त झाले आहे. या कार्यक्रमाला बहुतांशी पत्रकार उपस्थित होते. त्यांना उद्देशून ते म्हणाले, ‘अपेक्षित बातमी ही सनसनाटी असेल; पण ती जबाबदारीही असेल. ही बातमी ऐषआराम करण्यासाठी नाही, तर सर्वसामान्यांचे प्रश्‍न सोडवण्यासाठी असेल. त्यासाठी मला तुमचे मार्गदर्शनही लागणार आहे.’

‘कोल्हापूर लोकसभा उमेदवारीचा मुद्दा दिल्लीपर्यंत गेल्याचे मला कळते; पण मी दिल्ली काय मुंबईला सुद्धा गेलेलो नाही. आपल्याला कोल्हापूरच्या विकासासाठी काम करायचे आहे. भांडणे सोडवायची आहेत; पण बातमी समजल्यानंतर मीच तुम्हाला ती कळवेन, त्यावेळी तुम्हाला मी बोलवणार’, असेही शाहू महाराज यावेळी म्हणाले.