कोल्हापूर : कोल्हापूर लोकसभा (Kolhapur Loksabha Election) मतदारसंघातून महाविकास आघाडीचे उमेदवार म्हणून श्रीमंत शाहू छत्रपती महाराज (Shahu Chhatrapati Maharaj) यांचे नाव आघाडीवर आहे. त्याला दुजोरा देणारा फोटो त्यांच्या स्नुषा व माजी खासदार संभाजीराजे यांच्या पत्नी संयोगिता राजे यांनी इन्स्टाग्रामवर पोस्ट केल्याने राजकीय चर्चेला उधाण आले आहे.

कोल्हापूर लोकसभेसाठी ‘महाविकास’चा उमेदवार कोण याची उत्सुकता वाढली आहे. अशातच संयोगिताराजे (Sanyogitaraje) यांनी शाहू छत्रपती महाराज हे माजी खासदार संभाजीराजे (Sambhajiraje) यांना वाढदिवसानिमित्त शुभेच्छा देण्यासाठी अलिंगन देतानाचा फोटो सकाळी दहा वाजता समाज माध्यमावर शेअर केला आला. कोल्हापूर आणि हातकणंगलेच्या जागेवर अंतिम निर्णय येत असताना व्हायरल झालेल्या फोटोची चर्चा राजकीय वर्तुळात सुरु झाली आहे.

कोल्हापूर लोकसभा मतदारसंघातून माजी खासदार संभाजीराजे छत्रपती यांनी निवडणूक लढवण्याची इच्छा व्यक्त केल्यानंतर त्यांच्या नावाची चर्चा सुरु झाली होती. त्यातच महाविकास आघाडीकडून (Mahavikas Aghadi) संभाजीराजे यांचे वडील शाहू महाराज यांचे देखील नाव समोर आले होते. आज मुंबईत होणाऱ्या महाविकास आघाडीच्या बैठकीत कोल्हापूर आणि हातकणंगले लोकसभा मतदारसंघाबाबत अंतरिम चर्चा झाली, पण निर्णय आज होण्याची शक्यता आहे.

या बैठकीच्या पार्श्वभूमीवर हा मतदारसंघ काँग्रेसकडे गेल्यास शाहू महाराज यांच्या उमेदवारीवर शिक्कामोर्तब होण्याची शक्यता आहे. त्याच अनुषंगाने आज हा फोटो इंस्टाग्रामवर पोस्ट केला आहे. यावरून लोकसभेसाठी छत्रपती घराण्यातीलच उमेदवार असेल, ही शक्यता दाट झाली. त्यात संभाजीराजे स्वतः की शाहू महाराज याची उत्सुकता असेल.

कोल्हापूरचा उमेदवार कोण असेल?

लोकसभा निवडणुकीत कोल्हापूरचा उमेदवार कोण असेल, याची चर्चा सुरू असतानाच श्रीमंत शाहू छत्रपती महाराज व माजी खासदार संभाजीराजे छत्रपती यांचा संयोगीताराजे यांनी इन्स्टाग्रामवर शेअर केलेल्या या फोटोची चर्चा सुरू आहे, फोटोत शेजारी संयोगीताराजेही दिसत आहेत.