कोल्हापूर : ‘कोल्हापूर लोकसभा मतदारसंघातील (Kolhapur Loksabha Constituency) महायुतीच्या उमेदवारीबाबत निर्णय होईल, त्याबरोबरच आपण राहू. जो उमेदवार असेल त्याच्यासाठी जीवाचे रान करुन निवडून आणू’, असे पालकमंत्री हसन मुश्रीफ (Hasan Mushrif) यांनी येथे प्रसिद्धीमाध्यमांशी बोलताना सांगितले.

पालकमंत्री मुश्रीफ म्हणाले, ‘महायुतीकडून (Mahayuti) कोण उमेदवार दिला जाणार याबाबत मला माहिती नाही. मात्र जो उमेदवार देतील त्याचा मला प्रचार आणि नेतृत्व करावे लागेल. दुसरे काही करण्याचा आमचा स्वभाव नाही. आज तर आमच्या डोळ्यासमोर संजय मंडलिक हेच उमेदवार आहेत.’

‘मुश्रीफ यांना शाहू छत्रपतींबद्दल (Shahu Chhatrapati Maharaj) आदर असेल तर त्यांना बिनविरोध करा’, असे आवाहन आमदार सतेज पाटील यांनी केले आहे, त्याबाबत बोलताना मुश्रीफ म्हणाले, ‘राजकारणामध्ये असे होत नसते. आम्ही आदराच्या भावनेने शाहू महाराज यांच्याबद्दल बोललो होतो. आमच्या श्रद्धेला कुठेही डाग लागू नये ही आमची त्या पाठीमागची भावना होती. मात्र, सतेज पाटील यांना इतका बालिशपणा कुठून आला, हे समजत नाही.’