gad102.jpg
गडहिंग्लज ः अंत्योदय लाभार्थींना साडी वाटप करण्याच्या मागणीचे निवेदन शिवसेना ठाकरे गटाच्या शिष्टमंडळाने प्रांताधिकारी मल्लिकार्जुन माने यांना दिले.
-------------------------------------------------
‘गडहिंग्लज तालुक्यात
साडी वाटप तत्काळ करा’
गडहिंग्लज, ता. १० ः ‘अंत्योदय रेशन कार्डधारकांना साडी वाटप करण्याचा निर्णय शासनाने घेतला आहे. त्यानुसार मेमध्येच साड्या पुरवठा विभागाकडे आल्या. मात्र लोकसभा निवडणुकीची आचारसंहिता असल्याने त्यांचे वितरण झाले नाही. आता आचारसंहिता शिथील केल्याने तत्काळ साड्या वाटपाचे नियोजन करावे,’ अशी मागणी शिवसेना ठाकरे गटाचे शहर उपप्रमुख काशिनाथ गडकरी यांच्यासह शिष्टमंडळाने केली आहे.
अंत्योदय रेशन कार्डधारकांना दरमहा २० किलो गहू, १० किलो तांदूळ कमी दरात दिला जातो. याचा संबंधित कुटुंबांना मोठा आधार मिळत आहे. वस्त्रोद्योग विभागातर्फे या कार्डधारकांना साडीही वितरणाचा निर्णय घेतला आहे. पाच वर्षे अंत्योदय कुटुंबप्रमुख महिलेला दिवाळी भेट म्हणून साडी वाटप करण्यात येते. मेच्या पहिल्या आठवड्यातच पुरवठा विभागाकडे तालुक्यातील लाभार्थींच्या साड्या आल्या आहेत. त्या दुकानदारापर्यंत पोहोच करण्याच्या सूचना दिल्या होत्या. मात्र लोकसभा आचारसंहितेमुळे साडी वाटप थांबले आहे. आता आचारसंहिता शिथील केल्याने तत्काळ साडी वाटप करावे, अशी मागणी केली.
काशिनाथ गडकरी, लक्ष्मण पाच्छापुरे, अमित कोरी, निखिल सुतार, सुभाष जरळी यांच्या शिष्टमंडळाने प्रांताधिकारी मल्लिकार्जुन माने यांना निवेदन देऊन लक्ष वेधले.