गडहिंग्लज : कोरोना (corona) संसर्ग टाळण्यासाठी अजूनही आठवडा बाजाराला परवानगी दिलेली नाही. येथील आठवडा बाजार रविवारी असतो. गेल्या रविवारी आठवडा बाजाराचे स्वरुप आल्यानंतर पालिकेने या रविवारपासून कर्नाटकासह (karnatak) बाहेरील भाजी व इतर वस्तूंच्या विक्रेत्यांना शहरात विक्रीसाठी येण्यास मज्जाव केला जात आहे. आज सकाळी कर्नाटकातील (karnatak) काही व्यापारी व विक्रेत्यांना माघारी पाठविण्यात आले.

गेल्या तीन महिन्यापासून कोरोनाच्या वाढत्या संसर्गामुळे आठवडा बाजार बंद आहे. या बाजाराला महाराष्ट्र-कर्नाटक सीमाभागातील विक्रेते मोठ्या प्रमाणात येत असतात. विशेष करुन कर्नाटकातील भाजीपाला मोठ्या प्रमाणात गडहिंग्लजमध्ये येतो. अलीकडे महिन्याभरात कोरोनाचे निर्बंध शिथील केल्यानंतर बाजारपेठेतील व्यवहार सुरळीत झाले आहेत. लक्ष्मी रोड परिसरात तर रोजच भाजी व इतर विक्रेत्यांच्यामुळे आठवडा बाजाराचे स्वरुप येत आहे. विक्रेते आणि ग्राहकांच्या गर्दीने लक्ष्मी रोड फुलून गेलेले असते.

दरम्यान, निर्बंध शिथील झाल्याने कर्नाटकासह बाहेरील विक्रेतेही मोठ्या प्रमाणात गडहिंग्लज शहराकडे धाव घेत आहेत. फळविक्रेत्यांची संख्याही अधिक आहे. गेल्या रविवारी तर आठवडा बाजाराचे स्वरुप आले होते. मात्र या रविवारपासून पालिका प्रशासनाच्या वाहनाद्वारे ध्वनीक्षेपकावरुन बाहेरील विक्रेत्यांना शहरात प्रवेश नसल्याचे पुकारण्यात येत होते. काही जणांच्या घोळक्याकडून कर्नाटकातील विक्रेत्यांशी हुज्जत घालून त्यांना हटविण्यात येत होते. आठवडा बाजार अजूनही बंद असल्याने बाहेरील कोणीही शहरात विक्रीसाठी येवू नये अशी भूमिका घेतली जात आहे.

यामुळे आज सकाळी काही वाहनांना माघारी पाठविण्यात आल्याचे सांगण्यात आले. काही किरकोळ विक्रेत्यांशी वादावादीही सुरु होती. दरम्यान, आठवडा बाजारात श्रावणामुळे फळांची मोठ्या प्रमाणात आवक झाली होती. दरही आवाक्यात होते. यामुळे मागणी वाढली आहे. भाजीपाल्याची आवकही मोठ्या प्रमाणात झाली होती. खरेदीसाठी गडहिंग्लजसह पंचक्रोशीतील नागरिकांनी मोठी गर्दी केली होती.