रुकडी - साजणी (ता.हातकणंगले) येथील 'तो' युवक बुधवार (दि.८) रोजी पॉझिटिव्ह तर पुन्हा गुरुवारी (दि.९) रोजी निगेटिव्ह आल्याने साजणी करांचा जीव भांड्यात पडला आहे.

दरम्यान,इचलकरंजी येथील पॉझिटिव्ह रुग्णांच्या संपर्कात आलेला व विलगीकरण कक्षात असणारा साजणी (ता.हातकणंगले) येथील २५ वर्षीय युवकांस कोरोनाची लागण झाल्याने गावात भितीचे वातावरण पसरले होते.साजणी हे गाव इचलकरंजी शहरा नजीक आहे.हा युवक इचलकरंजी  येथील गारमेंटमध्ये कार्यरत आहे.सदर युवक ज्या गारमेंटमध्ये कार्यरत होता तिथे त्याचे दोन सहकारी कोरोना बाधित होते.त्यांच्या संपर्कात हा युवक आल्याने त्याला इचलकरंजी येथे संस्थात्मक विलगीकरण कक्षात ठेवण्यात आले होते. यावेळी 'त्या'  युवकाचा स्वॅब घेतला असता तपासणी अहवाल बुधवार (दि.८) रोजी रात्री उशीरा पाॅझिटिव्ह आला होता.त्यामुळे त्याला कोल्हापूर येथील सीपीआर रुग्णालयात तात्काळ दाखल केले होते.

वाचा - वळीवडे येथील 'त्या' कोरोना पॉझिटिव्ह तरुणाचा मृत्यू...

यावेळी त्याचा पुन्हा स्वॅब घेतला असता गुरुवार (दि.९) रोजी तो निगेटिव्ह आला. दरम्यान, साजणी येथे हा युवक राहात असलेला भाग बंद करुन तात्काळ औषध फवारणी करण्यात आली आहे .या युवकाच्या संपर्कातील त्याचे आई,वडील व भाऊ यांना इचलकरंजी येथे क्वारंटाईन करण्यात आले आहे.नागरिकांनी घाबरून न जाता मास्क,सॅनिटायजर चा वापर करावा तसेच कोणीही विनाकारण बाहेर पडू नये असे आवाहन कोरोना दक्षता  समिती साजणीच्या वतीने करण्यात आले आहे.

संपादन - मतीन शेख