Sangli Politics: गतवर्षी जिल्ह्यातील ६९२ ग्रामपंचयतीच्या निवडणुका झाल्या. सरपंचपदाची थेट निवडणुक झाल्याने निवडणुकीसाठी कार्यकर्त्यांना पक्षाच्या नेत्यांनी सुचविलेल्या उमेदवाराचा प्रचार करून त्याला निवडून आणावे लागले. परिणामी अति महत्वकांक्षी असलेल्या कार्यकर्त्यांना आपल्या मनाला मुरड घालावी लागली.

मात्र निवडणुकीपासून गटातटाच्या राजकारणात उपसरपंच या पदाला विशेष महत्व आले आहे. सरपंच नाही, निदान सरपंचाबरोबरीच्या खुर्चीत बसता यावे. प्रशासकीय अधिकारी, पक्षाचे नेते यांच्या समोर तोऱ्यात मिरविता यावे यासाठी अति महत्वकांक्षी नेते आता उपसरपंचपदासाठी आतुर झाले असल्याचे दिसतेय.

तालुक्यातील गावपातळीवरच्या कार्यकर्त्यांनी ग्रामपंचायतीच्या निवडणुकीपूर्वी काही गावात दरवर्षी वर्षी तर काही गावात दोन वर्षासाठी उपसरपंच करण्याचे नियोजन शंभर रुपयाच्या स्टॅम्पवर लेखी करार करून तर काही गावात बेल भंडारा उचलून आणाभाका घेवून फायनल केले आहे.

त्यामूळे नजीकच्या काळात तालुक्यात उपसरपंच पदाचे राजीनामे आणि निवड हा विषय चर्चेचा असणार आहे. ज्या गावात एक पक्षीय सत्ता आहे अशा ठिकाणी अडीच वर्षाच्या अटीवर दोन उपसरपंच 'पाहायला मिळणार आहेत. तर सर्व पक्षीय आघाड्या असलेल्या गावात पाच वर्षात कदाचित पाच उपसरपंच पाहायला मिळणार आहेत. तसे नियोजन होवूनच आघाड्या अस्तित्वात आल्या आहेत.

सरपंचपद हे लोक नियुक्त असल्याने किमान सहा महिने त्यांच्यावर अविश्वासाचा ठराव संमत करता येत नाही. तथापी स्थानिक स्वराज्य संस्थांच्या निवडणुकीपुर्वी जिथे अविश्वास प्रस्ताव आणण्याइतपत बहुमत आहे. अशा ग्रामपंचायतीमध्ये सरपंचपदाचे सहा महिने पुर्ण झालेल्या सरपंचाविरोधात अविश्वास ठराव आणून सर्वपक्षीय आघाडीतील बलवान घटक पक्ष असलेला गट आपल्या शक्तीचे प्रदर्शन करून स्थानिक स्वराज्य संस्थामध्ये आपणच किंग असल्याचे दाखवून देवू शकतो.