सातारा : बहुजन क्रांती मोर्चाने बुधवारी (ता. 29) भारत बंदची हाक दिली आहे. मात्र, या संपात सहभागी न होण्याचा निर्णय सातारा शहर व्यापारी संघटना, भवानी पेठ, पोवई नाका व सातारा शहर परिसरातील व्यापाऱ्यांनी घेतला असल्याची माहिती येथील व्यापाऱ्यांनी पत्रकाद्वारे दिली आहे.
 
नागरिक कायदा दुरुस्ती (सीएए), राष्ट्रीय नागरिकता नोंदणी (एनआरसी) कायद्याच्या विरोधात बहुजन क्रांती मोर्चाने बुधवारी भारत बंदची हाक दिली आहे. या बंदमध्ये सातारा बंदही ठेवण्याचे मोर्चाने काही दिवसांपूर्वी पत्रकार परिषदेत जाहीर केले होते. त्यासाठी सातारा जिल्ह्यातील व्यापारी, उद्योजक, दुकानदार, कर्मचारी, नागरिकांनी बंदमध्ये सहभागी व्हावे, असे आवाहन केले होते.

हेही वाचा-   त्या प्रकरणातून उदयनराजेंसह सर्वांची निर्दाेष मुक्तता

याबाबत सातारा शहर व्यापारी संघटनेने बंद न पाळण्याबाबत प्रसिद्धिपत्रक काढले आहे. त्यात नमूद केले आहे, की भारत बंदमध्ये सातारा शहरातील व्यावसायिक सहभागी होणार नाहीत. आंदोलन हे सरकारच्या निर्णयाविरोधात असते. त्यामुळे आंदोलनात विनाकारण सामान्य जनता व व्यावसायिक भरडले जात आहेत. यापूर्वी ता. 24 रोजी सातारा शहरात बंद पाळण्यात आला होता. या बंदचा आमचा दुरान्वये संबंध नसतानाही अतोनात नुकसान होत आहे.

हेही वाचा-  गोरे बंधू भिडले; परस्परविरोधी तक्रारीवरून गुन्हे दाखल

दरम्यान ता. 29 च्या बंदमध्ये साताऱ्यातील व्यापारी सहभागी होणार नाहीत. व्यवसाय सुरू ठेवण्यासाठी पोलिस व प्रशासनाने आम्हास संरक्षण द्यावे, अशी मागणीही पत्रकाद्वारे केली आहे. 
याबाबत प्रकाश गवळी, गुरुप्रसाद सारडा, अजितशेठ शहा, निळकंठ पालेकर, भरतशेठ राऊत, राजेंद्र कासट, सुदीप भट्टड, अशोक बादापुरे, महेश लोया, अजय देवी, संजय भोईटे, विजय येवले यांच्यासह व्यापाऱ्यांनी येथील व्यापारी पतसंस्थेच्या सभागृहात बैठक घेतली. यामध्ये हा निर्णय घेण्यात आल्याची माहिती श्री. सारडा यांनी दिली. बैठकीनंतर त्यांनी केलेले आवाहनाचे पत्र अवघ्या काही तासांत संपुर्ण राज्यात समाज माध्यमातून व्हायरल हाेऊ लागले आहे.

जरुर वाचा - सातारकरांनाे दाेन दिवस पाणी येणार नाही