नातेपुते : सध्या उन्हाच्या झळा तीव्र होत आहेत. अशा परिस्थितीत अनेक जण घरात फॅन, कुलर, ए.सी. इत्यादी साधनांनी गारवा निर्माण करून कडक उन्हापासून बचाव करीत आहेत. मात्र नातेपुतेतील राया शेती फार्ममध्ये मुऱ्हा म्हशी आणि सहिवाल गाईचे उन्हापासून रक्षण करण्यासाठी चक्क शॉवर बसविण्यात आले आहेत.

घरगुती जुगाड करून जनावरांना गारवा मिळावा यासाठी प्रयोग केला आहे. त्यामुळे जनावरे उन्हात शॉवरचा आनंद घेत आहेत.नातेपुते येथील राया विवेक राऊत यांच्या राया शेती फार्ममध्ये भागवत ऊर्फ माऊली सुर्वे यांच्या मार्गदर्शनाखाली मुऱ्हा म्हशी आणि सहिवाल गाईला शॉवर बसवले आहेत.

हे शॉवर पाठीवरील कीटकनाशक फवारणीच्या पंपाला जोडले असून, पंप चार्जिंग केल्यानंतर त्या पंपातील पाइप १६ एम.एम. प्लेन लॅटरला जोडण्यात आली आहे. प्रत्येकी दहा फुटावर शॉवर जोडले आहेत. या शॉवरखाली म्हशी आणि सहिवाल गाई येऊन उभा राहतात आणि मनसोक्त आनंद घेत आहेत. त्यांना एसीचा आनंद मिळत आहे. कडक उन्हापासून सुटका होत आहे.

सर्वत्र वृक्षतोड मोठ्या प्रमाणात होत आहे. मोठी झाडे विशेषतः लिंब, वड, पिंपळ, आंबा इत्यादी मोठी झाडे लोप पावली आहेत. शेतकऱ्यांच्या जनावरांच्या गोठ्यात प्रत्येक जनावर ही खुंटीला बांधून आहेत.

काही प्रगत शेतकरी मुक्त संचार गोठा करून जनावरांची काळजी घेत आहेत. मात्र सध्याच्या उन्हापासून मुक्या जनावरांची सुटका व्हावी यासाठी नातेपुतेतील हा उपाय केल्याने जनावरांना उन्हात पावसाळी आनंद मिळत आहे.