दक्षिण सोलापूर ः गेल्या आठवड्यात दक्षिण सोलापूर तालुक्‍यासह जिल्ह्यात अतिवृष्टीने हाहाकार उडाल्याने शेतकरी पुरता मेटाकुटीस आला आहे. या अतिवृष्टीमुळे शेतकऱ्यांच्या पिकांचे आतोनात नुकसान झाले आहे. आता शासनाने पंचनामे करण्यात वेळ न घालवता सरसकट नुकसान भरपाई द्यावी अन्यथा रस्त्यावर उतरु, असा सज्जड इशारा आमदार सुभाष देशमुख यांनी दिला. 

आमदार देशमुख यांनी मंगळवारी दक्षिण सोलापूर तालुक्‍यातील अकोले (मं), मनगोळी, वांगी, वडकबाळ, होनमुर्गी, राजूर, औराद, बोळकवठा, हत्तरसंग, कुडल आदी गावात जाऊन पूरग्रस्त तसेच अतिवृष्टीत नुकसान झालेल्या शेतकऱ्यांच्या कुटुंबियांना प्रत्यक्ष भेटून विचारपूस केली. या शेतकऱ्यांना शासनाकडून सर्वतोपरी मदत मिळवून देणार असल्याची ग्वाहीही त्यांनी यावेळी दिली. यावेळी मंद्रूपच्या अप्पर तहसीलदार उज्ज्वला सोरटे, भाजपा सरचिटणीस यतीन शहा, हणमंत कुलकर्णी, गौरीशंकर मेंडगुदले, विजय पाटील, समाधान घंटे, लक्ष्मण पाटील, शामराव हांडे, अप्पासाहेब पाटील, सुरेश पुजारी, गुरण्णा तेली, चिदानंद बगले, संदीप टेळे, बनसिध्द वडरे, संगप्पा केरके यांच्यासह मंडल अधिकारी, कृषी अधिकारी, तालुका विस्तार अधिकारी, ग्रामसेवक, तलाठी उपस्थित होते. 

आमदार देशमुख पुढे म्हणाले की, सीना-भीमा या दोन्ही नद्या तालुक्‍यातून वाहतात. त्यामुळे येथील हजारो एकर पिकात पुराचे पाणी घुसले. तसेच शेकडो घरात पाणी शिरल्याने घरांचेही मोठे नुकसान झाले आहे. त्यामुळे आता पंचनामे न करता शासनाने तातडीने मदत द्यावी. एकही शेतकरी वंचित राहणार नाही याची दक्षता घ्यावी. लवकरात लवकर मदत न दिल्यास रस्त्यावर उतरून शेतकऱ्यांसाठी संघर्ष करावा लागेल. यावेळी महापुरात अडकलेल्या नदाफ आणि जाधव कुटुंबातील सात लोकांना वाचवलेल्या मनगोळी गावातील परशुराम भोई, कमलाकर भोई, अनिल भोई, प्रकाश भोई, बालाजी भोई या तरुणांचे आमदार देशमुख यांनी कौतुक केले. 

संपादन : अरविंद मोटे