चारित्र्याच्या संशयावरून शिक्षिका पत्नी आणि १२ वर्षीय मुलाचा खून करून शिक्षकाने स्वतः गळफास घेऊन आत्महत्या केल्याची घटना बार्शी शहरात घडली. शिक्षक मानसिक रुग्ण होता. ही घटना काल (मंगळवार) सकाळी साडेनऊ वाजता उघडकीस आली. बार्शी पोलिस ठाण्यात घटनेची नोंद झाली आहे.(Latest Marathi News)

सोन्यासारखा संसार सुरू होता, पती-पत्नी दोघेही शिक्षक अन्अवघ्या बारा वर्षाचा गोंडस मुलगा. पण पत्नीने नोकरी करू नये, यावरुन दोघांमध्ये तंटा होत असे. तसेच पत्नीबद्दल संशयाचे भूतही शिक्षकाच्या मनात घोंघावत होते. शिक्षक मानसिक रुग्ण होता आणि यातूनच त्याने पत्नी, मुलाचा खून करून स्वतः गळफास घेऊन आत्महत्या करीत संसार उद्ध्वस्त केला. अतुल सुमंत मुंढे (वय ४२ रा. नाईकवाडी प्लॉट) असे आत्महत्या केलेल्या शिक्षकाचे नाव आहे. (Marathi Tajya Batmya)

तृप्ती अतुल मुंढे (वय ३७), ओम अतुल मुंढे (वय १२) अशी खून झालेल्यांची नावे आहेत. युवराज मुंढे यांनी पोलिसात माहिती दिली. मुलगा, सून आणि नातू वरच्या मजल्यावरून सकाळ होऊन उशीर झाला तरी खाली आले नाहीत, म्हणून सुमंत मुंढे यांनी जाऊन पाहिले असता, दार बंद होते. आवाज दिला तरी कोणताही प्रतिसाद मिळाला नाही. अखेर शेजाऱ्यांना बोलावून दार उघडले असता, तिघेही मृत अवस्थेत असल्याचे आढळले.(Latest Maharashtra News)

घटनेची माहिती समजताच पोलिस उपअधीक्षक जालिंदर नालकूल, सहायक पोलिस निरीक्षक ज्ञानेश्वर उदार यांच्यासह पोलिस पथकाने घटनास्थळी धाव घेऊन पंचनामा केल्यानंतर मृतदेह ग्रामीण रुग्णालयात नेण्यात आले. एसटी महामंडळामध्ये वाहक म्हणून सेवानिवृत्त झालेले सुमंत मुंढे यांचा मुलगा अतुल तर नगरपरिषदेचे सेवानिवृत्त शिक्षणाधिकारी विलास खाडे यांची मुलगी तृप्ती यांचा विवाह झाला होता. वांगी (ता. करमाळा) येथे जिल्हा परिषद शाळेत अतुल मुंढे शिक्षक म्हणून कार्यरत होता. तर तृप्ती मुंढे बार्शीतील अभिनव प्राथमिक शाळेत शिक्षिका म्हणून कार्यरत होत्या.

अतुल मुंढे गंभीर मानसोपचार रुग्ण होता, त्याला अनेक दिवसापासून गोळ्या सुरू होत्या. तो ता. २६ रोजी बार्शीतील खासगी मानसोपचार रुग्णालयात तपासणीसाठी गेला होता. पंधरा दिवसांपासून त्याने गोळ्या बंद केल्या होत्या. शिक्षक अतुल मुंढे याने गळफास घेऊन आत्महत्या केली तर तृप्ती हिच्या गळ्याच्या मधोमध व छातीच्या उजव्या बाजूला चाकूने भोसकल्याने तिचा मृत्यू झाला तर ओम याचा उशीने नाक-तोंड दाबून खून करण्यात आला. अशी माहिती डॉ. रवींद्र माळी, वैद्यकीय अधिकारी, ग्रामीण रुग्णालय, बार्शी यांनी दिली आहे.