सांगोला (सोलापूर) : सांगोला तालुक्‍यात अतिवृष्टीचा तडाखा बसल्याने 50 लाख रुपयांचे नुकसान झाल्याचा प्राथमिक अंदाज महावितरणने वर्तविला आहे. अतिवृष्टी व पुरामुळे शेकडो रोहित्रे (ट्रान्स्फॉर्मर) बाधित झाली होती. विद्युत मीटर, रोहित्र, विद्युत खांब, विद्युत वाहिन्या आणि उपकरणांच्या नुकसानीबरोबरच विद्युत पुरवठा बंद असल्यामुळे झालेले महसुली नुकसानही मोठे आहे. पूरस्थिती ओसरल्यानंतर युद्धपातळीवर प्रयत्न करत घरगुती वीज ग्राहकांचा वीजपुरवठा सुरळीत करण्यात आला असल्याची माहिती महावितरणचे उपकार्यकारी अभियंता आनंद पवार यांनी दिली. 

सांगोला तालुक्‍याला अतिवृष्टी व पुराचा सर्वाधिक तडाखा बसला आहे. माण नदीकाठच्या व कासाळ ओढ्याकाठच्या शेतीचे तसेच महावितरणचे मोठ्या प्रमाणात नुकसान झाले आहे. महावितरणचे सुमारे 50 लाख रुपयांचे नुकसान झाल्याचा प्राथमिक अंदाज आहे. तालुक्‍यातील कृषी व घरगुती वीज वाहिन्यांवरील वीज यंत्रणेला फटका बसला आहे. सांगोला तालुक्‍यात अतिवृष्टी व पुरामुळे महावितरणचे 91 उच्चदाब विद्युत वाहिन्यांचे खांब, 96 लघुदाब विद्युत वाहिन्यांचे खांब मोडून पडले आहेत. तसेच 40 उच्चदाब विद्युत वाहिन्यांचे खांब, 46 लघुदाब विद्युत वाहिन्याचे खांब वाकले आहेत. तर पाच ठिकाणचे ट्रान्स्फॉर्मर पडल्याने रोहित्रांमधून होणारा विद्युत पुरवठा खंडित झाल. त्यातील काही रोहित्रांचा वीज पुरवठा पूरस्थितीमुळे बंद करावा लागला. हजारो घरगुती व कृषी ग्राहकांचा वीजपुरवठा बंद पडला. 

महावितरणचे उपकार्यकारी अभियंता आनंद पवार व कर्मचाऱ्यांनी पूरस्थिती ओसरल्यानंतर युद्धपातळीवर प्रयत्न करत अवघ्या तीन दिवसांत घरगुती ग्राहकांचा वीजपुरवठा सुरळीत करण्यात यश मिळवले आहे. मात्र अनेक विहिरी गाळाने भरल्या असल्याने तसेच चिखलामुळे कृषी वीजपंपाचा विद्युतप्रवाह सुरू करण्यासाठी अनेक अडचणी येत आहेत. जवळपास 650 कृषी वीजपंपांचा वीजपुरवठा सुरू करण्यासाठी आठ ठेकेदारांची नियुक्ती केली आहे. ठेकेदार, महावितरणचे शाखा अभियंता व कर्मचाऱ्यांच्या मदतीने एका आठवड्यात कृषी पंपाचा वीजपुरवठा सुरळीत होणार असल्याची माहिती उपकार्यकारी अभियंता श्री. पवार यांनी दिली. 

इतर परिमंडलातून पॉवर ट्रॉन्स्फॉर्मर, रोहित्रे, लोखंडी वीजखांब, वीज वाहिन्या, सिंगल फेज व थ्री फेजचे नवीन मीटर देखील पूरग्रस्त भागात उपलब्ध करून दिले आहेत. अनेक पाणीपुरवठा योजना, प्राथमिक आरोग्य केंद्रे, रुग्णालये, घरगुती ग्राहकांना प्राधान्याने पर्यायी व्यवस्थेतून वीजपुरवठा सुरू करण्यात आला आहे. 

उपकार्यकारी अभियंता श्री. पवार म्हणाले, तालुक्‍यात अतिवृष्टी व पुरामुळे अनेक ठिकाणी विजेचे खांब पडले आहेत. गरजेच्या ठिकाणी अन्य मार्गाने पर्यायी विद्युत पुरवठा सुरू करण्यात आला आहे. गरजेच्या ठिकाणी ठेकेदारामार्फत युद्धपातळीवर कामे सुरू केली आहेत. महूद परिसरात सर्वांत जास्त नुकसान झाले आहे. तालुक्‍यातील सर्वच ठिकाणचा नुकसानीमुळे खंडित झालेला विद्युत पुरवठा सुरू केला जाईल. 

संपादन : श्रीनिवास दुध्याल