सोलापूर : एकेकाळी खिलार बैलांच्या बाजारासाठी प्रसिद्ध असलेल्या गड्डा यात्रेतील जनावरांचा बाजार यंदा फक्त म्हशींसाठीच आहे जिल्ह्यात लम्पीचा प्रादुर्भाव असल्याने यंदा गड्डा यात्रेतील जनावरांच्या बाजारात गायी व बैलांना परवानगी नाकारण्यात आली असून, यंदाचा बाजार फक्त म्हशींसाठी भरणार आहे. जिल्ह्यात लम्पी या विषाणूजन्य व संसर्गजन्य आजारामुळे शेकडो गायी, बैल व वासरांचा मृत्यू झालेला आहे. त्यामुळे ८ सप्टेंबर २०२२ रोजीच्या राज्य शासनाच्या अधिसूचनेनुसार संपूर्ण राज्य हे नियंत्रित क्षेत्र म्हणून घोषित करण्यात आले होते.

जनावरांमध्ये होणाऱ्या लम्पी आजाराचा प्रादुर्भाव रोखण्यासाठी बाजार भरविण्यास निर्बंध घालण्यात आले होते. आता हे निर्बंध शिथिल करण्यात आले आहेत. त्यामुळे ग्रामदैवत श्री सिद्धेश्वर यात्रेनिमित्त १४ जानेवारीपासून श्री रेवणसिद्धेश्वर मंदिर परिसरात जनावरांचा बाजार भरण्याचा मार्ग मोकळा झाला आहे.

जिल्हाधिकारी मिलिंद शंभरकर यांनी लम्पीच्या पार्श्वभूमीवर जनावरांच्या बाजारावर असलेले निर्बंध शिथिल केले आहेत. नव्या आदेशानुसार म्हशींचा बाजार भरविण्यास सर्वत्र परवानगी देण्यात आली आहे. गोवंशीय म्हणजेच गाय, बैल व वासरे यांचा बाजार भरविण्यास परवानगी देण्यात आलेली नाही. त्यामुळे यंदाच्या गड्डा यात्रेच्या बाजारात गाईंचा समावेश करता येणार नसल्याचेही आदेशात नमूद करण्यात आले आहे.

या जिल्ह्यांतील जनावरांवर असणार बंदी

अमरावती, नाशिक महसुली विभागातील कोणत्याही जिल्ह्यांमधून सोलापूर जिल्ह्यात गुरांची ने-आण करता येणार नाही. पुणे, औरंगाबाद, नागपूर या महसुली विभागातून केवळ संक्रमित नसलेल्या व लसीकरण केलेल्या गुरांची वाहतूक करण्यास परवानगी देण्यात आली आहे. यासाठी सक्षम अधिकाऱ्याचे आरोग्य प्रमाणपत्र वाहतुकीदरम्यान सोबत असणे गरजेचे आहे.