पिंपरी : इमारतीच्या बाराव्या मजल्यावरून पडल्याने पिता-पुत्राचा मृत्यू झाला. ही घटना वाकड येथे घडली. आदेश क्रांती तायडे (वय १६), क्रांती भीमराव तायडे (वय ४४, दोघेही, रा. मालपाणी ग्रीन हाऊसिंग सोसायटी, पिंक सिटी रोड, वाकड, मूळ-जळगाव) अशी मृत्यू झालेल्या पिता-पुत्रांची नावे आहेत.

क्रांती, त्यांचा मुलगा आदेश, एक मुलगी व आई-वडील इमारतीच्या बाराव्या मजल्यावर राहतात. दरम्यान, आदेश हा अगोदर खाली पडला. त्यानंतर क्रांती हे देखील खाली पडले. दोघेही रक्ताच्या थारोळ्यात पडल्याने परिसरातील नागरिकांनी मदतीसाठी धाव घेत पोलिसांना माहीती दिली. काही वेळातच पोलिसांनी घटनास्थळी धाव घेत दोघांना उपचारासाठी रुग्णालयात दाखल केले. मात्र, उपचारापूर्वीच त्यांचा मृत्यू झाल्याचे डॉक्टरांनी सांगितले.

क्रांती उच्चशिक्षित होते. त्यांची मानसिक स्थिती ठीक नसल्याने त्यांच्यावर उपचार सुरु होते. यासह आदेशची प्रकृतीही ठीक नसायची. याप्रकरणी वाकड पोलिस ठाण्यात आकस्मिक मृत्यूची नोंद झाली असून पोलिस अधिक तपास करीत आहेत.