पिंपरी : ‘तू माझ्याकडे डोळे वटारून बघतो का. थांब तुला दाखवतोच’ असे म्हणत तरुणावर कोयता व सिमेंटच्या गट्टूने प्राणघातक हल्ला केला. याप्रकरणी चार जणांच्या टोळक्यावर गुन्हा दाखल झाला आहे. ही घटना पिंपरीतील लालटोपीनगर येथे घडली.

नबीलाल बंदगी शेख (रा. चिंचवडेनगर, वाल्हेकरवाडी रोड, चिंचवड) असे या हल्ल्यात जखमी झालेल्या व्यक्तीचे नाव आहे. त्यांनी पिंपरी पोलिस ठाण्यात फिर्याद दिली आहे. त्यानुसार सुमीत ससाने (वय २४), साजन ससाने (दोघेही रा. अमृतेश्वर कॉलनी, मोरवाडी कोर्टाच्या मागे, पिंपरी) व त्यांच्या दोन साथीदारांवर गुन्हा दाखल झाला आहे. फिर्यादी हे शनिवारी (ता. २८) दुपारी साडेबाराच्या सुमारास लालटोपी नगर येथील महाराष्ट्र टी हाऊस या चहाच्या दुकानात चहा पीत होते. त्यावेळी आरोपी कोयते घेऊन आले.

आरोपी सुमीत याने फिर्यादी यांना ‘तू माझ्याकडे डोळे वटारून बघतो का. थांब तुला दाखवतोच’ असे म्हणत कोयत्याने व सिमेंटच्या गट्टूने मारले. यात फिर्यादी यांच्या डोक्याला गंभीर दुखापत झाली. याप्रकरणी पिंपरी पोलिस ठाण्यात गुन्हा दाखल असून पोलिस अधिक तपास करीत आहेत.