पिंपरी - डॉक्टरसह त्यांच्या मुलीचे अश्लील फोटो व्हायरल करण्याची धमकी देत खंडणी उकळली. याप्रकरणी तिघांवर गुन्हा दाखल झाला आहे. हा प्रकार बालेवाडी येथे घडला.

याप्रकरणी ४६ वर्षीय डॉक्टरने फिर्याद दिली आहे. त्यानुसार हिंजवडी पोलिसांनी एका महिलेला अटक केली असून जितेंद्रकुमार व अन्य एकावर गुन्हा दाखल आहे. बालेवाडी येथील इसेन्शिया हाईट्स येथे सुलेखा डॉटकॉम स्पा अँड ब्युटी सर्व्हिसेस ऍट होम याद्वारे जितेंद्रकुमार याने सर्व्हिसेस देण्याच्या बहाण्याने फिर्यादीकडे रोख रकमेची मागणी करून धमकी दिली.

फिर्यादी पैसे देत नसल्याचे माहित होताच फिर्यादी व फिर्यादीच्या मुलीचे न्यूड फोटो तयार करून ते फोटो एस्कॉर्ट साईट पे भेज दूंगा अशी धमकी दिली. हे फोटो फिर्यादीच्या व्हॅट्सऍपला पाठवून फिर्यादीकडे दहा हजारांची मागणी केली. गुगल पे द्वारे चार हजार रुपये ट्रान्सफर करून घेतले . तसेच फोटो व्हायरल करण्याची धमकी दिली. हिंजवडी पोलिस अधिक तपास करीत आहेत.