देहू, ता. १२ ः कोरोनाच्या वाढत्या संसर्गामुळे देहूतील संत तुकाराम महाराज देऊळवाडा आणि वैकुंठस्थान येथील मंदिर मकर संक्रांतीला(ता.१४) दर्शनासाठी बंद राहणार आहे, अशी माहिती संत तुकाराम महाराज संस्थानने प्रसिद्धपत्रकाद्वारे दिली आहे. मकर संक्रांतीला देऊळवाड्यातील विठ्ठलरुक्मिणी आणि संत तुकाराम महाराज मंदिरात महिला मोठ्या प्रमाणात ओवसा वाहण्यासाठी येतात. मात्र सध्या कोरोनाचा संसर्ग झपाट्याने वाढत आहे. संसर्ग टाळण्यासाठी संत तुकाराम महाराज संस्थानने देऊळवाडा आणि वैकुंठस्थान येथील मंदिर शुक्रवारी(ता.१४) पहाटे पाच वाजल्यापासून रात्री आठ वाजेपर्यंत बंद ठेवण्यात येणार आहे. त्यामुळे भाविकांनी सहकार्य करावे, असे आवाहन संस्थाने अध्यक्ष नितीन महाराज मोरे आणि विश्वस्त मंडळाने केले आहे. शनिवारी(ता.१५) पासून नियमितपणे भाविकांना दर्शनासाठी देऊळवाडा खुला करण्यात येणार आहे.