किवळे, ता. १४ : रावेत येथील पिंपरी-चिंचवड एज्युकेशन ट्रस्ट संचालित एस. बी. पाटील पब्लिक शाळेच्या वतीने महानगरपालिकेच्या आदेशानुसार शनिवारी ‘माझी माती, माझा देश’ अभियान राबविण्यात आले.
याप्रसंगी पाचवीतील विद्यार्थ्यांनी ‘पंचप्रण’ प्रतिज्ञा घेतली. गाव ते शहरापर्यंत मातीविषयी जनजागृती, प्रेम आणि साक्षरता निर्माण होण्यासाठी तसेच आपल्या प्राणांची आहुती देणाऱ्या शूरविरांचा सन्मान व्हावा याकरिता हे अभियान राबविले.
प्रत्येकाने देशाभिमान बाळगला पाहिजे तसेच साक्षर झाले पाहिजे व इतरांना साक्षरतेचे महत्त्व पटवून दिले पाहिजे. शूरविरांचा सन्मान करावा हे देशाचे नागरिक म्हणून प्रत्येकाचे कर्तव्य आहे, असा संदेश मुख्याध्यापिका डॉ. बिंदू सैनी यांनी दिला.
प्रभातफेरीमध्ये १२३ विद्यार्थी सहभागी झाले होते. विद्यार्थ्यांनी उल्हासामध्ये ‘एकत्रित व्हा आनंदी राहा’ तसेच ‘मातीला नमन वीरांना वंदन’ ‘अनेकता में एकता - यही भारत की विशेषतः’ अशा घोषणा दिल्या. याप्रसंगी शुभांगी कुलकर्णी, अर्चना प्रभुणे, रावेत पोलिस ठाण्याच्या उपनिरीक्षक प्राची तोडकर आदी उपस्थित होते.पिंपरी-चिंचवड एज्युकेशन ट्रस्टचे अध्यक्ष ज्ञानेश्वर लांडगे, पद्माताई भोसले, शांताराम गराडे, विठ्ठल काळभोर, माजी मंत्री हर्षवर्धन पाटील, डॉ. गिरीश देसाई यांनी मार्गदर्शन केले.