पिंपरी, ता. १४ ः छत्रपती शिवाजी महाराजांच्या राज्याभिषेकाला साडेतीनशे वर्ष पूर्ण होत आहेत. यानिमित्त भक्ती शक्ती चौक येथे शनिवारी (ता. १६) सायंकाळी पाच वाजता ढोल ताशांचे महावादन करून छत्रपती शिवाजी महाराजांना मानवंदना देण्यात येणार आहे. यात शहरातील ५५ ढोल-ताशा पथकांनी सहभाग घेतला असून एक हजाराहून अधिक ढोल व ३५० ताशांचे एकाचवेळी वादन केले जाणार आहे. तब्बल ३५ मिनिटे हे वादन सुरू राहणार असून भगव्या ध्वजाला मानवंदनाही या वेळी देण्यात येणार आहे. अखिल पिंपरी-चिंचवड शिवजयंती समन्वय समितीचे समन्वयक संदीप जाधव यांनी बुधवारी चिंचवड येथे आयोजित केलेल्या पत्रकार परिषदेत ही माहिती दिली.
या कार्यक्रमाला छत्रपती शिवाजी महाराजांचे वंशज खासदार छत्रपती उदयन महाराज भोसले, आमदार छत्रपती शिवेंद्रराजे भोसले, ज्येष्ठ अभिनेते सयाजी शिंदे प्रमुख पाहुणे म्हणून उपस्थित राहणार आहेत. तर नुकत्याच प्रदर्शित झालेल्या सुभेदार या चित्रपटातील कलाकार देखील हजेरी लावणार आहेत, असे त्यांनी सांगितले. आयोजन अखिल पिंपरी-चिंचवड शिवजयंती समन्वय समिती, ढोल-ताशा महासंघ आणि शिवप्रेमी नागरिकांनी केले असून या कार्यक्रमाला शहरातील शिवप्रेमींनी उपस्थित राहावे, असेही आवाहन त्यांनी केले.
या वेळी राष्ट्रीय स्वयंसेवक संघाचे पिंपरी-चिंचवड सहकार्यवाह जयंत जाधव, ढोल ताशा महासंघाचे पिंपरी-चिंचवड शहर अध्यक्ष विशाल मानकर, शिवजयंती समन्वय समितीचे कुणाल साठे आदी उपस्थित होते.