पिंपरी, ता. १६ : गहाळ झालेल्या मोबाईल फोनच्या तक्रारींची माहिती संकलित करून त्यातील अ‍ॅक्टिव्ह झालेले दहा लाख १४ हजार रुपये किमतीचे ७० स्मार्ट फोन पोलिसांनी हस्तगत केले. हे स्मार्ट फोन हे त्यांच्या मूळ मालकांना लवकरच देण्यात येणार आहेत.
पोलिस आयुक्तालयाच्या हद्दीत २०२३ व मार्च २०२४ या दरम्यान अनेक मोबाईल गहाळ झाल्याबाबत तक्रारी दाखल झाल्या. त्याबाबत पोलिस आयुक्त विनयकुमार चौबे यांनी गुन्हे शाखेला हरविलेल्या मोबाईलचा शोध घेण्याच्या सूचना दिल्या. त्यानुसार, दरोडा विरोधी विभागाने एक पथक तयार केले. गहाळ मोबाईलच्या तक्रारींची माहिती संकलित करून त्यांचा तांत्रिकदृष्ट्या तपास सुरु केला. गहाळ झालेले परंतु अ‍ॅक्टिव्ह झालेले मोबाईलची माहिती संकलित केली. त्यातून अ‍ॅक्टिव्ह मोबाईलच्या वापरकर्त्यांचे नाव व पत्ते मिळाले. पथकातील अंमलदारांनी अ‍ॅक्टिव्ह झालेले ७० स्मार्ट मोबाईल हे अमरावती, कोल्हापूर, नगर, नाशिक, बीड, जालना, छत्रपती संभाजीनगर, सोलापूर या जिल्ह्यांतून हस्तगत केले. यात नामांकित कंपन्यांच्या महागड्या फोनचा समावेश आहे.