पिंपरी : तरुणाचं एका तरुणीवर प्रेम होतं. मात्र, या प्रेमात तरुणाला त्याची जात आडवी आली. 'तू खालच्या जातीचा आहेस, तुझी लायकी आहे का, आमच्या नातेवाईक मुलीवर प्रेम करायची', असे म्हणत तरुणीच्या नातेवाइकांनी त्या तरुणाला संपवलं. ही धक्कादायक घटना पिंपळे सौदागर येथे घडली. याप्रकरणी सांगवी पोलिस ठाण्यात ऍट्रॉसिटीसह खुनाचा गुन्हा दाखल झालाय, तर पोलिसांनी आरोपींना अटक केलीय. 

ताज्या बातम्यांसाठी डाऊनलोड करा ई-सकाळचे ऍप  

विराज विलास जगताप (वय 18) असे खून झालेल्या तरुणाचं नाव आहे. याप्रकरणी सांगवी पोलिसांनी हेमंत कैलास काटे, सागर जगदीश काटे, कैलास मुरलीधर काटे, जगदीश मुरलीधर काटे (सर्व रा. पिंपळे सौदागर) यांना अटक केलीय. तसेच, आणखी दोघांना ताब्यात घेतलंय. याप्रकरणी विराजचे चुलते जितेश वसंत जगताप (रा. जगतापनगर, पिंपळे सौदागर) यांनी फिर्याद दिलीय. मृत विराज याचे आरोपींच्या नातेवाईक तरुणीशी प्रेमसंबंध होते. या कारणावरून आरोपींनी आपआपसात संगनमत करून रविवारी (ता. 7) रात्री दहाच्या सुमारास पिंपळे सौदागर येथील शिव बेकरीजवळ विराज हा दुचाकीवरून जात असताना त्याच्या दुचाकीला टेम्पोने पाठीमागून धडक दिली.

पिंपरी चिंचवडच्या बातम्या वाचण्यासाठी येथे ► क्लिक करा

तो खाली पडल्यानंतर त्याला मारण्यासाठी आरोपी टेम्पोतून खाली उतरले. यामुळे घाबरलेला विराज पळून जाऊ लागला असता हेमंत काटे याने लोखंडी रॉड विराजच्या डोक्‍यात मारला. तर सागर काटे याने पाठीत दगड मारला. कैलास काटे, जगदीश काटे व अन्य दोघांनी विराजचे हातपाय पकडले. त्यावेळी जगदीश काटे म्हणाला की, "तू खालच्या जातीचा आहे. तुझी लायकी आहे का, आमच्या नातेवाईक मुलीवर प्रेम करायची, तरी तू तिच्यावर प्रेम करतो का', असं जातीवाचक बोलत तो विराजच्या अंगावर थुंकला. त्यास जबर मारहाण करून तेथेच सोडून दिलं. 

पुण्याच्या बातम्या वाचण्यासाठी येथे ► क्लिक करा 

या घटनेत गंभीर जखमी झाल्यानं विराजला उपचारासाठी खासगी रुग्णालयात दाखल केलं. उपचारादरम्यान सोमवारी (ता. 8) दुपारी त्याचा मृत्यू झाला. याप्रकरणी सांगवी पोलिसांनी ऍट्रॉसिटीसह खुनाचा गुन्हा दाखल केलाय. तसेच, आरोपींना मंगळवारी न्यायालयात हजर केलं असता त्यांना 16 जूनपर्यंत पोलिस कोठडी सुनावण्यात आलीय. पोलिस अधिक तपास करीत आहे.