लोकप्रिय बॉलिवूड दिग्दर्शक अनुराग कश्यप याने आपल्या चित्रपटांच्या जोरावर प्रेक्षकांना चित्रपटगृहात येण्यास भाग पाडलं. तो बॉलिवूडमधील नावाजलेल्या दिग्दर्शकांपैकी एक आहे. त्याचे 'ब्लॅक फ्रायडे', 'नो स्मोकींग', 'देव डी', 'गुलाल', 'दॅट गर्ल ईन यलो बुट्स' आणि 'गॅंग्स ऑफ वासेपूर' हे चित्रपट हिट ठरले. त्याच्या वेबसिरीजचीदेखील प्रेक्षकांमध्ये चर्चा असते.

अशातच आता त्याची एक मुलाखत सोशल मीडियावर व्हायरल होतेय ज्यात तो एका मराठी अभिनेत्रीबद्दल बोलताना दिसतोय. या अभिनेत्रीच्या आगाऊ मॅनेजरमुळे अनुरागने तिला जवळजवळ सिनेमातून काढलं होतं. कोण होती ती अभिनेत्री? नेमकं काय घडलेलं.

अनुरागने नुकतीच बॉलिवूड बबलला मुलाखत दिली. या मुलाखतीत बोलताना तो म्हणाला, 'आधीची बॉलिवूडची परिस्थिती वेगळी होती. आता सगळ्यांना बॉलिवूडमधून पैसे कमावणं सोपं वाटतं. एका चित्रपटाची निर्मिती करून आपण बक्कळ पैसे कमावू असं वाटतं.

पण तसं नाहीये. तर कलाकारांच्या मागण्याही वाढल्यात. मी एक चित्रपट करत होतो. त्यात मला त्या अभिनेत्रीला घ्यायचं होतं जिच्यासोबत मी आधी तीनवेळा काम केलंय. ही अभिनेत्री म्हणजे अमृता सुभाष. पण तिच्या मॅनेजरकडून मला एक भलीमोठी मागण्यांची यादी पाठवण्यात आली. सिंगल डोअर व्हॅनिटी व्हॅन पाहिजे, हे पाहिजे, ते पाहिजे. मी म्हटलं काय पागल झालाय का?

पुढे अनुराग म्हणाला, 'मी सरळ मॅनेजरला फोन केला आणि सांगितलं मी अमृताला रिप्लेस करतोय. मला ती नकोय. मी दुसरी अभिनेत्री बघेन. थँक यू. नंतर अमृताने स्वतः मला फोन केला आणि विचारलं काय झालं, मी काय केलंय? तिला स्वतःला माहीत नव्हतं तिच्या मॅनेजरने काय काय मागण्या केल्यात. ती तिच्या मॅनेजरला खूप ओरडली. माझ्यावतीने हे सगळं सांगायची तुझी हिंमत कशी झाली.' हे एकदा नाही असं अनेक कलाकारांच्या बाबतीत घडलंय. पण अशा कलाकारांना मी सरळ माझ्या चित्रपटातून काढून टाकतो.' अनुरागची ही मुलाखत सध्या सोशल मीडियावर व्हायरल होतेय.