Ayushmann Khurrana : आयुष्मान खुराना बॉलीवूड इंडस्ट्रीतील लोकप्रिय अभिनेत्यांपैकी एक आहे. त्याच्या अभिनयाचे नेहमीच कौतुक होत असते. त्याचे नुकतेच रिलीज झालेले ‘रेह जा’ हे गाणे अशा लोकांसाठी आहे, जे आपल्या जोडीदारापासून दूर असताना एकमेकांबद्दलच्या छोट्या छोट्या गोष्टी लक्षात ठेवतात. त्याच्यासोबत या गाण्यात हरजोत कौरने तिचा आवाज दिला आहे. या गाण्याला प्रेक्षकांचे भरभरून प्रेम मिळत आहे.

या गाण्याचे बीटीएस समोर आले आहेत. यामध्ये आयुष्मानने एक मनोरंजक खुलासा केला आहे. तो म्हणाला की, त्याचे आयुष्य संगीताशिवाय काहीच नाही. तो असेही म्हणाला, ‘मी चित्रपटांशिवाय जगू शकतो; पण संगीताशिवाय जगू शकत नाही.

माझ्या आयुष्यातील लहान-लहान क्षण आणि छोट्या छोट्या गोष्टींचे सौंदर्य मी मनापासून जपतो. मी छोट्या छोट्या गोष्टींनी नाराज होतो आणि छोट्या गोष्टींनी आनंदीदेखील होतो.’ आयुष्मान अलीकडे ‘ड्रीम गर्ल २’मध्ये दिसला होता. याशिवाय तो सारा अली खानसोबत ॲक्शन-कॉमेडी चित्रपट आणि करीना कपूर खानसोबत एका चित्रपटात झळकणार आहे.