छोट्या पडद्यावरील सर्वाधिक गाजलेल्या मालिकांमधील एक असणारी लोकप्रिय मालिका म्हणजे 'देवमाणूस'. या मालिकेची प्रेक्षकांमध्ये एक वेगळीच क्रेझ होती. मालिकेच्या दुसऱ्या भागानेही प्रेक्षकांची मनं जिंकली होती. गावागावात सगळे ही मालिका पाहण्यासाठी टीव्ही समोर बसायचे. या मालिकेमुळे अभिनेता किरण गायकवाड घराघरात पोहोचला. त्याची लोकप्रियता प्रचंड होती. आता नुकत्याच दिलेल्या मुलाखतीत त्याने ही मालिका सुरू असताना घडलेला एक प्रसंग सांगितला. जेव्हा पोलिसांनी त्यांची गाडी अडवली होती.

किरण लवकरच 'डंका' हरिनामाचा' या चित्रपटात झळकणार आहे. या चित्रपटानिमित्त त्याने लोकमत फिल्मीला मुलाखत दिली. या मुलाखतीत बोलताना किरण म्हणाला, 'आम्हाला अपेक्षित होतं की लोकांनी आपल्या भूमिकेला शिव्या घालाव्या. ते मी एंजॉय करत होतो. कधीकधी मला स्वतःला ते शिव्या घालतायत असंही वाटायचं. पण ठीक आहे ते त्या पात्राचं कौतुक होतं. एकदा काय झालं, म्ही मित्र मित्र कारमध्ये मुंबईहून पुण्याला निघालो होतो. पुण्यामध्ये काय चेकनाके लागलेले असतात रात्रीचे. तर माझ्या मित्रांना मी ड्रॉप करायला निघालो होतो. कागदपत्र वगरे सगळं होतं आमच्याकडे. मित्र म्हणाले, अरे हे बघ पोलीस. मी म्हणालो, मी आहे. घाबरू नका.'

किरण पुढे म्हणाला, 'मी खाली उतरलो आणि त्या पोलिसांनी लगेच हात केला अरे तू, ये ये. त्या पोलिसाने खांद्यावर हात ठेवला वगरे. त्यांनी शेजारच्या पोलीस वाल्याला म्हटलं ते ओळखलं का याला? पलीकडचा पोलिसवाला म्हणाला, कुठल्या गुन्ह्याखाली आत घेतलेला रे याला? चेहरा इतका ओळखीचा वाटतोय मला. दुसरा म्हणाला, ते नाही नाही तो मालिकेतला अभिनेता आहे. मग तो म्हणाला अरे हो हो, देवमाणूस. मग फोटोवगरे काढून दिलं सोडून. असं ते सतत क्राइम करून चेहरा इतका गुन्हेगारासारखा वाटायला लागलेला.' किरण यापूर्वी 'चौक' चित्रपटात दिसला होता.