मराठमोळ्या अभिनेत्री निर्मिती सावंत यांनी आपल्या अभिनयाने चित्रपटसृष्टी आणि रंगमंच दोन्ही गाजवलं. त्या कायमच प्रेक्षकांच्या मनावर अधिराज्य गाजवत आल्या. त्यांनी 'गंगुबाई नॉनमॅट्रिक' मधून घराघरात ओळख मिळवली. तर चित्रपटांनी त्यांना प्रेक्षकांच्या मनात स्थान मिळवून दिलं. 'खबरदार' चित्रपटातील त्यांची भूमिका प्रचंड गाजली. सध्या त्या 'व्हॅक्युम क्लिनर' या नाटकातून प्रेक्षकांच्या भेटीला येत आहेत. या नाटकात त्या अभिनेते अशोक सराफ यांच्यासोबत दिसत आहेत. अशात आता त्यांनी नुकतीच दिलेली मुलाखत सोशल मीडियावर व्हायरल होतेय.

सिनेसृष्टीत काम करायचं म्हणजे तुम्ही एका विशेष पठडीत बसलं पाहिजे असं अनेकांना वाटतं. तुमच्या शरीराला विशिष्ट फिगर हवी. गेल्या काही वर्षात झिरो फिगर ही संकल्पना रुजली. तुम्ही तशा असाल तरच तुम्हाला भूमिका मिळतात असं अनेकांना वाटतं. मात्र निर्मिती यांनी ही समजूत मोडीत काढली. तुमचा अभिनय चांगला असेल तर तुम्ही काहीही करू शकता हे त्यांनी दाखवून दिलं. निर्मिती यांनी नुकतीच लोकमत फिल्मीला मुलाखत दिली. या मुलाखतीत त्यांना झिरो फिगर बद्दल प्रश्न विचारण्यात आला. त्याबद्दल बोलताना निर्मिती म्हणाल्या, 'असावं की अभिनेत्रींनी झिरो फिगर. माझं त्यावर काहीच म्हणणं नाही. मी नाहीये त्याला काय करणार.माझं असं काही म्हणणं नाहीये बाबा की नाहीये मी झिरो फिगर तरी मी दाखवतेच तुम्हाला, नाही.'

छान दिसावं असं प्रत्येकाला वाटतं

त्या पुढे म्हणाल्या, ' माझं प्रामाणिक म्हणणं आहे जे तुमच्या नशिबात लिहिलेलं असतं ते कुणीही हिरावून घेऊ शकत नाही. कमी मुलींनी प्रयत्न केले असतील का? ज्या जिरो फिगर नाहीयेत त्यांनी या फिल्डमध्ये येण्याचे? का नसेल मिळालं? कदाचित देवाने त्यांना तेवढं टॅलेंट नसेल दिलं. असेल काही प्रॉब्लेम असेल. मलाही वाटतं की छान फिगर असावी पण नाहीये. काय करू आता? मला असं वाटतं, त्यामुळे काही काहीही अडत नाहीये. मग चाललंय, चालूदे. वाटतं तर प्रत्येकाला. कुणाला नाही वाटत? कितीही टॅलेंटेड असलं तरी छान दिसावं असं प्रत्येकाला वाटतं. मी छान दिसायचा प्रयत्न करते. झिरो फिगर नाहीये. ठीक आहे.'निर्मिती शेवटच्या 'झिम्मा २' या चित्रपटात दिसल्या होत्या.