बॉलीवुड अभिनेत्री रकुल प्रीत सिंगचा भाऊ अमन प्रीत सिंग याच्याबद्दल एक मोठा बातमी समोर आली आहे. हैदराबाद येथील कोकेन रॅकेटमध्ये त्याचे नाव पुढे आले असून त्याला अटक करण्यात आली आहे . या प्रकरणात एकूण ३० नावांचा खुलासा करण्यात आला आहे.

तेलंगाना अँटी नारकोटिक्स डिपार्टमेंटला २.६ किलो कोकेन सापडले आहे, जे विक्रीसाठी हैदराबाद येथे आणण्यात आले होते. टीमने या रॅकेटचा भंडाफोड केला आणि ३० संभावित ग्राहकांची नावे उघड केली(यामध्ये एक अभिनेत्रीचा भाऊ देखील आहे). आता ही सर्व नावे हैदराबाद कमिश्नर यांच्याकडे पुढील तपासणीसाठी पाठवण्यात आली आहेत.

महत्वाची बाब म्हणजे, २०२० साली सुशांत सिंह राजपूत ड्रग्ज केसच्या तपासादरम्यान रकुल प्रीतचे नाव देखील पुढे आले होते. यासोबतच इतरही अनेक अभिनेत्रीची नावे प्रकरणाशी जोडली गेली होती, ज्यामध्ये रकुल देखील होती. मीडियामध्ये आपले नाव आल्यावरून तिने नाराजीदेखील व्यक्त केली होती. इतकेच नाही तर याविरोधात ती उच्च न्यायालयात देखील गेली होती. रकुलने तिला बदनाम करण्याचा प्रयत्न होत असल्याचे म्हटले होते.