काँग्रेसचे माजी मंत्री आणि राष्ट्रवादीचे नेते बाबा सिद्दीकी यांची त्यांचा मुलगा झिशान सिद्दीकी यांच्या कार्यालयाबाहेर गोळ्या झाडून हत्या करण्यात आली. त्यांनंतर सगळीकडे एकच गोंधळ उडाला. त्यांना ताबडतोब इस्पितळात दाखल करण्यात आलं मात्र त्यापूर्वीच त्यांचा मृत्यू झाला. याघटनेनंतर त्यांना पाहण्यासाठी अर्ध बॉलिवूड लोटलं होतं. सलमान खानपासून ते संजय दत्त पर्यंत अनेक कलाकार त्यांच्या दर्शनासाठी पोहोचले होते. मात्र नेते म्हणून कारकीर्द गाजवणाऱ्या बाबा सिद्धीकी यांचा बॉलिवूडशी नेमका संबंध काय?

सुनील दत्त यांच्याशी मैत्री

बाबा सिद्दीकी दरवर्षी बॉलिवूड वर्तुळात गाजतात ते त्यांच्या इफ्तार पार्टीमुळे. त्यांच्या इफ्तार पार्टीला संपूर्ण बॉलिवूड झाडून हजेरी लावतं. याच इफ्तार पार्टीत बाबा सिद्दीकी यांच्यामुळे सलमान खान आणि शाहरुख खान यांचं कित्येक वर्षांचं भांडण मिटलं होतं. कतरिनाच्या वाढदिवसाच्या पार्टीत सलमान आणि शाहरुख यांचा वाद झाला होता. त्यानंतर ते दोघेही एकमेकांशी बोलत नव्हते. मात्र २०१३ ला बाबा सिद्दीकी यांनी इफ्तार पार्टीत त्यांचा हा अबोला मिटवला होता. मात्र बाबा सिद्दीकी यांचा बॉलिवूडमधील मार्ग हा सुनील दत्त यांनी मोकळा करून दिला होता. ते अभिनेते सुनील दत्त होते ज्यांनी बाबा सिद्दीकी यांना १९९९ साली बांद्रा येथून आमदारकीचं तिकीट मिळवून देण्यास मदत केली होती. तेव्हा बाबा सिद्दीकी सलग तीनवेळा बांद्रा येथून आमदार म्हणून निवडून आले.

ते सुनील दत्तचं होते ज्यांनी सिद्दीकी यांची बॉलिवूडच्या झगमगत्या जगाशी ओळख करून दिली होती. संजय दत्त देखील त्यांच्याशी जोडला गेला. त्यानंतर त्यांनी सलमान खान, शाहरुख खान सगळ्याचं बड्या सेलिब्रिटी आणि इन्फ्लुएन्सर्सला पार्टीसाठी आमंत्रण द्यायला सुरुवात केली. सुनील दत्त यांच्यामुळे सिद्दीकी यांच्या खऱ्या अर्थाने बॉलिवूडमध्ये एंट्री झाली असं म्हणता येईल.