पुणे - लॉन्ड्री व्यावसायिक तरुणाचा खुन करुन पुरावा नष्ट करण्यासाठी मृतदेह डेक्कन येथील नदीपात्रामध्ये टाकल्याचा धक्कादायक प्रकार सोमवारी दुपारी सव्वा दोन वाजण्याच्या सुमारास उघडकीस आला. दरम्यान, याप्रकरणी डेक्कन पोलिस ठाण्यात गुन्हा दाखल करण्यात आला आहे.

गणेश सुरेश कदम (वय 35, रा. शनिवार पेठ) असे खून झालेल्या तरुणाचे नाव आहे. सोमवारी दुपारी सव्वा दोन वाजण्याच्या सुमारास डेक्कन येथील नदीपात्रात मृतदेह आढळल्याची माहिती पोलिसांना मिळाली. त्यानुसार, डेक्कन पोलिसांनी घटनास्थळी तत्काळ धाव घेतली.त्यावेळी एका तरुणाच्या गळ्यावर धारदार शस्त्रांनी वार करुन त्याचा खुन झाला असल्याचे उघडकीस आले.

पोलिसांनी मृतदेहाची तपासणी केल्यानंतर त्याच्याकडे असलेल्या कागदपत्रांवरुन मृतदेहाची ओळख पटली. त्यानंतर पोलिसांनी अधिक चौकशी केल्यानंतर संबंधित तरुण हा लॉन्ड्री व्यावसायिक असल्याची तसेच त्याची शनिवार पेठेत लॉन्ड्रीचे दुकान असल्याची माहिती मिळाली. दरम्यान, रविवारी सायंकाळी सात वाजता कदम हे घराबाहेर पडले होते, तेव्हापासून त्यांचे कुटुंबीय त्यांचा शोध घेत होते, मात्र ते त्यांना सापडले नाहीत. दरम्यान, सोमवारी दुपारी सव्वा दोन वाजता एका सर्व्हिस सेंटर चालकाने नदीपात्रात मृतदेह पडला असल्याची खबर पोलिसांना दिली. पोलिस घटनास्थळी पोचल्यानंतर घटनास्थळी नागरीकांची मोठ्या प्रमाणात गर्दी झाली. या प्रकरणाचा तपास डेक्कन पोलिस करत आहेत.