पुणे : शेअर बाजारात गुंतवणुकीच्या आमिषाने काही गुंतवणूकदारांची एकूण ८६ लाख रुपयांची फसवणूक झाल्याचा प्रकार उघडकीस आला आहे. याप्रकरणी खासगी वित्तीय संस्थेच्या मालकासह तीन जणांविरुद्ध गुन्हा दाखल करण्यात आला. या प्रकरणी एका गुंतवणूकदाराने चतु:शृंगी पोलिस ठाण्यात फिर्याद दिली.

त्यावरून इन्कोफिना कन्सल्टंट कंपनीचे मालक अमर बिरादार, चेतन मोरवाल, ज्ञानेश्वरी बिरादार (रा. बाणेर रस्ता) यांच्यावर गुन्हा दाखल करण्यात आला. तक्रारदार डेक्कन जिमखाना परिसरात राहतात. त्यांनी इन्कोफिना कंपनीत आधी १५ लाख रुपये गुंतविले.

त्यांना कोणताही परतावा मिळाला नाही. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. पोलिसांच्या तपासात तक्रारदारासह अन्य गुंतवणूकदारांचीही फसवणूक झाल्याचे उघडकीस आले. गुन्हे शाखेचे पोलिस निरीक्षक नांद्रे अधिक तपास करीत आहेत.