किरकटवाडी : शनिवार व रविवार खडकवासला धरण आणि सिंहगड किल्ला परिसरात फिरण्यासाठी आलेल्या 309 पर्यटकांवर हवेली पोलिसांनी धडक कारवाई करत तब्बल एक लाख तेरा हजार सहाशे रुपये दंड वसूल केला आहे. पर्यटकांवर कारवाई करण्यासाठी हवेली पोलिसांनी खडकवासला धरण, डोणजे येथील गोळेवाडी फाटा व सिंहगडाच्या घाट रस्त्यावरील कोंढणपूर फाटा येथे कडक नाकाबंदी केली होती. पुणे जिल्हाधिकारी डॉ. राजेश देशमुख यांच्या आदेशानुसार सिंहगड किल्ला व आजूबाजूची पर्यटन स्थळे अद्याप पर्यटकांसाठी बंद आहेत. तरीही नियम मोडून अनेक पर्यटक सिंहगड व आजूबाजूच्या परिसरात गर्दी करत होते. मागील आठवड्यातील अनुभवानंतर पुणे ग्रामीणचे पोलीस अधीक्षक डॉ. अभिनव देशमुख यांच्या आदेशानुसार हवेली पोलिसांनी या शनिवारी व रविवारी पर्यटकांना रोखण्यासाठी कडक नाकाबंदी केली होती. यासाठी 3 पोलीस अधिकारी, 22 महिला व पुरुष पोलीस कर्मचारी आणि 10 होमगार्ड जवान तैनात करण्यात आले होते.

हवेली पोलिस ठाण्याचे पोलिस निरीक्षक सदाशिव शेलार यांनी दिलेल्या माहितीनुसार शनिवार दि. 19 जून रोजी पहाटेपासूनच पोलिसांनी नाकाबंदी करण्यास सुरुवात केली होती. शनिवारी दिवसभरात 132 पर्यटकांवर कारवाई करत 47 हजार 600 रुपये दंड वसूल करण्यात आला तर रविवारी तब्बल 177 पर्यटकांवर कारवाई करत 66 हजार रुपये दंड वसूल करण्यात आला. शनिवार-रविवार मिळून एकूण 309 पर्यटकांवर कारवाई करत हवेली पोलिसांनी 1 लाख 13 हजार 600 रुपये दंड वसूल केला आहे. नाकाबंदीच्या ठिकाणी दंड आकारून पर्यटकांना माघारी पाठविण्यात आले‌.

'सकाळ' चे मानले आभार- सिंहगड किल्ला, खडकवासला धरणासह आजूबाजूच्या परिसरात पर्यटकांना बंदी असून नियम मोडून येणाऱ्या पर्यटकांवर दंडात्मक कारवाई करण्यात येणार असल्याचे वृत्त 'सकाळ'मधून शुक्रवार व शनिवार असे दोन दिवस प्रसिद्ध झाले होते. त्यामुळे 70% पर्यटकांची गर्दी कमी झाली व पोलिस प्रशासनावरील ताण कमी झाला असे म्हणत पोलीस निरीक्षक सदाशिव शेलार व सहाय्यक पोलिस निरीक्षक अर्जुन घोडेपाटील पाटील यांनी 'सकाळ'चे आभार मानले.