पुणे : विद्युत ठेकेदाराकडून ५० हजार रुपयांची लाच स्वीकारताना ‘महावितरण’च्या बाणेर उपकेंद्रातील सहायक अभियंत्याला लाचलुचपत प्रतिबंधक (एसीबी) विभागाने ताब्यात घेतले. रवींद्र नानासाहेब कानडे (वय ३७) असे अधिकाऱ्याचे नाव आहे. ‘एसीबी’च्या पथकाने शुक्रवारी (ता.१) बाणेर येथील कार्यालयाच्या आवारात ही कारवाई केली.

तक्रारदार हे सरकारी विद्युत ठेकेदार आहेत. त्यांना आर.एम.सी. प्लांटसाठी विद्युत पुरवठा करण्याचे कंत्राट मिळाले होते. या कामाच्या पूर्णत्वाचा दाखल्यासाठी सहायक अभियंता कानडे यांनी तक्रारदाराकडे ५० हजार रुपये लाचेची मागणी केली होती.

याबाबत तक्रारदार यांनी ‘एसीबी’ कार्यालयात अर्ज दिला होता. त्याची पडताळणी केल्यानंतर बाणेर कार्यालयात सापळा रचून कानडे याला लाच स्वीकारताना ताब्यात घेतले. याबाबत चतु:शृंगी पोलिस ठाण्यात गुन्हा दाखल केला आहे.