किरकटवाडी : टोळीयुद्ध किंवा दहशत माजविण्यासाठी वापरला जात असलेला 'कोयता' आता भावकीतील भांडणापर्यंत पोहोचला आहे. जमिनीच्या वादातून सिंहगड रस्त्यावरील खडकवासला येथील कोल्हेवाडी येथे तरुणावर कोयत्याने वार करण्यात आले असून यात संकेत मनोहर मते (वय 31, रा. खडकवासला) हा तरुण गंभीर जखमी झाला आहे.

याप्रकरणी हवेली पोलीस ठाण्यात गुन्हा दाखल करण्याची प्रक्रिया सुरू असल्याची माहिती प्रभारी अधिकारी अनमोल मित्तल यांनी दिली आहे. मिळालेल्या माहितीनुसार संकेत मते व त्यांच्या भावकीतील इतरांमध्ये वडिलोपार्जित जमिनीवरुन वाद सुरू आहेत.

आज दुपारी दोन ते अडीच वाजण्याच्या सुमारास संकते मते व त्यांच्या घरातील इतर सदस्य कोल्हेवाडी येथील शेतात असताना भावकीतील काही पुरुष व महिला तेथे आले. त्यावेळी झालेल्या शाब्दिक बाचाबाचीतून संकेत मते याच्या डोक्यात कोयत्याने वार करण्यात आले.

गंभीर जखमी झालेल्या संकेतला जवळील खासगी रुग्णालयात दाखल करण्यात आले असून त्याच्या डोक्याला तब्बल चौतीस टाके पडले आहेत. याबाबत माहिती मिळताच हवेली पोलीस ठाण्याचे अधिकारी व कर्मचारी तातडीने घटनास्थळी दाखल झाले होते. याबाबत आरोपींची नावे निश्चित झाले असून त्यांच्यावर गुन्हा दाखल करण्याची प्रक्रिया सुरू असल्याची माहिती हवेली पोलीस ठाण्याचे प्रभारी अधिकारी आयपीएस अनमोल मित्तल यांनी दिली आहे.