बारामती, ता. 26- येथील गृहविभागाच्या सबजेलच्या बांधकामासाठी राज्य शासनाने 14 कोटी 96 लाख रुपयांच्या खर्चाच्या अंदाजपत्रकास प्रशासकीय मंजूरी दिली असून या पुढील काळात बारामतीच्या जिल्हा कारागृहाचा दर्जा दोन ऐवजी तीन असेल. या संदर्भात राज्य शासनाने अध्यादेश जारी केला असून आता शासननिर्णयानुसार बारामती शहर सबजेल या कारागृहास या पुढील काळात बारामती जिल्हा कारागृह वर्ग दोन ऐवजी वर्ग तीन घोषित करण्यात आले आहे.

या बाबतच्या शासन परिपत्रकात नमूद करण्यात आले आहे की, दिनांक २६.४.२०२३ च्या शासन निर्णयान्वये "बारामती शहर, सबजेल" या कारागृहास "बारामती जिल्हा कारागृह वर्ग-२" असे घोषित करण्यात आले.

कारागृहातील कायदा व सुव्यवस्था बिघडल्यास कारागृह परिसरातील अधिकारी/कर्मचारी यांना तातडीने कर्तव्यावर बोलावून परिस्थिती आटोक्यात आणण्याकरिता कारागृह नियमावलीतील तरतुदीनुसार कारागृह परिसरातच शासकीय निवासस्थान असणे आवश्यक असल्याने, सदर कारागृहाची बंदी क्षमता कमी करुन निवासस्थाने देखील याच भुखंडामध्ये बांधण्यात येणार आहेत.

त्यामुळे, आता बारामती जिल्हा कारागृह वर्ग-२ ची बंदी क्षमता 130 इतकी होणार असल्याने सदर कारागृहास बारामती जिल्हा कारागृह वर्ग-3 म्हणून घोषित करण्याबाबतचा प्रस्ताव कारागृह विभागाच्या अतिरिक्त पोलिस महासंचालकांकडून शासनास प्राप्त झाला होता. त्यानुषंगाने, 26 एप्रिल 2023 च्या शासन निर्णयामध्ये ही सुधारणा करण्यात आली आहे.