पुणे : वाकड (Wakad) येथील एका व्यावसायिकाच्या बँक खात्याची माहिती हॅक करीत सायबर चोरट्यांनी त्यांच्या खात्यातून ३८ लाख चार हजार रुपये लांबवले आहेत. व्यावसायिकाने या व्यवहाराबातचे ओटीपी, अलर्टस, मेसेज किंवा मेल कोणालाही पाठवलेले नाहीत. तसेच ते मोबार्इल बँकिंग वापरत नसताना देखील हा प्रकार घडला आहे.

काळेवाडी फाटा येथे राहणा-या एका व्यावसायिकाने याबाबत फिर्याद दिली आहे. त्यानुसार वाकड पोलिस ठाण्यात विविध कलमांनुसार चोरट्यांवर गुन्हा दाखल करण्यात आला आहे. १७ जुलै रोजी हा प्रकार घडला. पोलिसांनी दिलेल्या माहितीनुसार, फिर्यादी यांचा कंपनी सल्लागार म्हणून व्यवसाय आहे. त्यांचे एचडीएफसी बँकेत स्वतःचे आणि फर्मचे प्रत्येकी एक असे दोन खाते आहेत.

१५ जुलै रोजी त्यांना त्यांच्या खात्यातून दोन लाख १४ हजार रुपये वर्ग झाल्याचा मेसेज आला. त्यामुळे त्यांनी बँकेतील शिल्लक रक्कम तपासली असता त्यांना दोन्ही खात्यातून ३८ लाख चार हजार रुपये वर्ग झाल्याचे समजले. त्यामुळे त्यांनी त्वरित याबाबत पोलिसांत तक्रार दिली.

या व्यवहाराबातचे ओटीपी, अलर्टस, मेसेज, मेल किंवा बँक खात्याची माहिती मी कोणालाही पाठवलेले नाही. तसेच मी मोबार्इल बँकिंग वापरत नसताना देखील हा प्रकार घडला आहे, असे व्यावसायिकाने दिलेल्या फिर्याद नमूद आहे. वाकड पोलिस या गुन्ह्याचा तपास करीत आहेत.