पुणे - शहराच्या मध्यवर्ती भागात दिवाळी सण व संकष्ट चतुर्थीमुळे होणाऱ्या गर्दीमुळे वाहतुक कोंडी टाळण्यासाठी वाहतुकीच्या परिस्थितीनुसार रविवारी छत्रपती शिवाजी महाराज रस्ता रविवारी बस व चारचाकी वाहनांसाठी बंद ठेवण्यात येणार आहे. त्यामुळे वाहन चालकांनी पर्यायी मार्गाचा वापर करावा, असे आवाहन वाहतुक शाखेतर्फे करण्यात आले आहे.

दिवाळी सणाच्या खरेदीसाठी रविवारी बाजारपेठेमध्ये गर्दी होण्याची शक्‍यता आहे. त्याचबरोबर रविवारी संकष्ट चतुर्थी असल्याने मध्यवर्ती भागातील गणपतीचे दर्शन घेण्यासाठी भाविकांची गर्दी होण्याची शक्‍यता आहे. त्यामुळे लक्ष्मी रस्ता, बाजीराव रस्ता, केळकर रस्ता व कुमठेकर रस्ता, महात्मा फुले मंडई येथे वाहतुक कोंडी होऊ शकते. हि वाहतुक कोंडी टाळण्यासाठी रविवारी सकाळी सात वाजल्यापासून वाहतुकीच्या परिस्थितीनुसार गर्दी संपेपर्यंत छत्रपती शिवाजी महाराज रस्त्यावरुन बस व चारचाकी वाहनांना वाहतुकीसाठी रस्ता बंद ठेवला जाणार आहे.

वाहनचालकांनी स. गो. बर्वे चौकातुन जंगली महाराज रस्त्याने खंडुजीबाबा चौक, टिळक चौक, टिळक रस्त्याने पुढे जावे. तसेच महापालिकेकडे जाणाऱ्या वाहन चालकांनी स. गो. बर्वे चौकातुन जंगली महाराज रस्त्याने झाशीची राणी लक्ष्मीबाई चौकातुन डावीकडे वळून इच्छितस्थळी जावे, असे आवाहन वाहतुक शाखेतर्फे करण्यात आले आहे.