पुणे : कसबा पेठ विधानसभेच्या पोटनिवडणुकीत महाविकास आघाडीने एकजूट दाखविल्यामुळे इतिहास घडला. लोकसभा निवडणुकीतही इंडिया आघाडीने अशीच एकजूट दाखविली; तर पुण्यात इतिहास घडू शकतो, असा विश्‍वास इंडिया आघाडीच्या नेत्यांनी शुक्रवारी झालेल्या बैठकीत व्यक्त केला.

काँग्रेस भवनात इंडिया आघाडीचे उमेदवार रवींद्र धंगेकर यांच्या प्रचारार्थ बैठकीचे आयोजन केले होते. यावेळी काँग्रेसचे शहराध्यक्ष अरविंद शिंदे, मोहन जोशी, अंकुश काकडे, सुभाष वारे, अजित अभ्यंकर, संदीप ताम्हणकर, वसंत पवार, दत्ता पाकिरे, अन्वर राजन, संदीप बर्वे, इब्राहिम खान, अशोक तातुगडे, संदेश दिवेकर, दीपक पाटील, लता भिसे, अरविंद जक्का यांच्यासह शिवसेना उद्धव बाळासाहेब ठाकरे पक्षाचे पदाधिकारी, महाविकास आघाडीतील नेते, सामाजिक व स्वयंसेवी संस्थांचे पदाधिकारी आदी उपस्थित होते.

शिंदे म्हणाले, ‘‘इंडिया आघाडीच्या माध्यमातून आपली ताकद वाढली आहे. विविध स्वयंसेवी व पर्यावरणवादी संघटनांचे कार्यकर्ते बरोबर आहेत. संविधान वाचविण्यासाठी, हुकूमशाही मोडून काढण्यासाठी आपण लढायचे आहे. धंगेकर निवडणुकीनंतर संसदेत पुणेकरांचा आवाज ठामपणे मांडतील.’’ धंगेकर म्हणाले, ‘‘कसबा पेठ पोटनिवडणुकीत महाविकास आघाडीचे कार्यकर्ते माझ्या पाठीशी राहिले. आता इंडिया आघाडीचे कार्यकर्तेही माझ्याबरोबर आले आहेत. एकदिलाने काम करून आपण पुन्हा इतिहास घडवू.’’

काकडे म्हणाले, ‘‘पुणे लोकसभेसाठी काँग्रेसमधून अनेक इच्छुक होते. मात्र धंगेकरांना उमेदवारी मिळाली. आता कोणीही नाराज नाही. सर्वजण स्वतःला धंगेकर व उमेदवार समजून काम करत आहेत. महाविकास आणि इंडिया आघाडीच्या सर्व कार्यकर्त्यांनी प्रचारात झोकून द्यावे.’’ संविधानाप्रती निष्ठा, लोकशाही, धर्मनिरपेक्षता आणि सामाजिक न्यायाची भूमिका घेऊन सर्व समाजघटकांना एकत्र आणत भाजपचा पराभव करण्याचा निर्धार यावेळी करण्यात आला. लोकसभा निवडणुकीच्या नियोजनासंदर्भात विविध सूचना इंडिया फ्रंट आघाडीतील प्रमुखांकडून करण्यात आल्या.