पुणे, ता. १५ : वस्तूंवर छापल्या जाणाऱ्या अवाजवी ‘एमआरपी’मुळे (मॅक्सिमम रिटेल प्राइस) ग्राहकांची होणारी आर्थिक लूट थांबवण्यासाठी अखिल भारतीय ग्राहक पंचायतीने केंद्र सरकारविरोधात देशव्यापी आंदोलन पुकारले आहे. आता जनजागृती मोहीम सुरू असून, २५ मे रोजी दिल्लीत जंतर-मंतर येथे राष्ट्रीय स्तरावर निदर्शने केली जाणार आहेत, अशी माहिती पंचायतीचे राष्ट्रीय कार्यकारिणी सदस्य सूर्यकांत पाठक यांनी दिली. उत्पादक कंपन्या उत्पादन खर्चाच्या अनेक पटींनी अधिक किंमत छापून ग्राहकांची दिशाभूल करत असल्याचा आरोप संघटनेने केला आहे. प्रामुख्याने सौंदर्यप्रसाधने, इलेक्ट्रॉनिक्स, खाद्यपदार्थ आणि औषधांच्या किमतीत मोठी तफावत आढळल्याचे पाठक यांनी नमूद केले. या संदर्भात केंद्र सरकारकडे विविध मागण्या केल्या असून, जिल्हाधिकाऱ्यांना निवेदने देण्यात येत आहेत. ‘एमआरपी’ची संकल्पना ग्राहकांच्या हितासाठी असली, तरी सध्या तिचा गैरवापर होत असल्याने लोकशाही मार्गाने आंदोलन छेडल्याचे पंचायतीने स्पष्ट केले आहे.