पुणे- लॉकडाउनमध्ये सवलती मिळाल्यानंतर पुण्यात कोरोना पसरत असल्याची बाब महापालिकेने गांभीर्याने घेतली आहे. ज्या परिसरात, सोसायट्यांत रुग्ण सापडतील, तो भाग लगेचच "सील' करून, रहिवाशांसाठी बंधने घालण्यात आली आहेत. रुग्ण वाढल्याने सूक्ष्म बाधित क्षेत्रांची संख्या 109 इतकी झाली असून, नव्या आणि जुन्या बाधित क्षेत्रांत ये-जा करण्यासही मर्यादा आणल्या आहेत. अत्यावश्‍यक सेवा मात्र सुरू राहणार आहेत. हा आदेश बुधवारी मध्यरात्रीपासून लागू करण्यात आला आहे. 

ताज्या बातम्यांसाठी डाऊनलोड करा ई-सकाळचे ऍप   

पुण्यासह राज्यात येत्या 31 जुलैपर्यंत लॉकडाउन वाढविण्यात आले आहे. त्यातच पुण्यात रुग्ण आणि मृतांची संख्या झपाट्याने वाढत आहे. या पार्श्वभूमीवर महापालिकेने शहरांसाठी नवी भूमिका ठरवली असून, त्यात रुग्ण संख्या वाढत असलेल्या भागांचा बाधित क्षेत्रात समावेश करून, खबरदारीच्या उपाययोजना आखल्या आहेत. याआधीच्या 73 क्षेत्रात बदल करून, आता नव्याने 109 क्षेत्र बाधित म्हणून जाहीर करण्यात आले आहेत. 

सूक्ष्म बाधित क्षेत्रात नव्याने रस्ते बंद करून, विनाकारण ये जा करणाऱ्यांना रोखले जाणार आहे. तर ज्या भागांतील रुग्ण कमी झाले आहेत, तेथील मर्यादा कमी करून, नागरिकांना सवलती देण्यात येणार आहेत. रस्ते बंद करणे आणि वाहतुकीसाठी मोकळे ठेवण्याबाबत महापालिका आणि पोलिस यंत्रणा एकत्र काम करेल. पुढील आदेश येईपर्यंत नवा निर्णय अमलात असेल, असे महापालिका आयुक्त शेखर गायकवाड यांनी स्पष्ट केले आहे. 

पुण्याच्या बातम्या वाचण्यासाठी येथे ► क्लिक करा

पुणे शहरात कोरोनाचा संसर्ग वाढत असल्याने आवश्‍यक त्या उपाययोजना करीत आहोत. त्यातूनच रूग्ण वाढलेल्या काही भागांत बंधने घालण्यात आली आहेत तर रुग्ण कमी झालेल्या भागातील नागरिकांना सवलती देण्यात येणार आहेत. कोरोनावर मात करण्यासाठी प्रत्येक नागरिकाने बंधने व नियम पाळण्याची गरज आहे. 
-शेखर गायकवाड, आयुक्त, महापालिका