पुणे : पिंपरी-चिंचवडमधील देहूरोड विभागाचे सहायक पोलिस आयुक्त मुगुटलाल पाटील यांच्या सांगण्यावरून पाच लाखांची लाच मागत त्यातील एक लाख रुपये लाच स्वीकारल्याप्रकरणी एकास अटक केली आहे. येथील एका खासगी रुग्णालयाच्या पार्किंगमध्ये लाचलुचपत प्रतिबंधक विभागाने (एसीबी) सापळा लावून ही कारवाई केली.

ओंकार भरत जाधव (वय ३२, रा. वाकड) असे अटक केलेल्या व्यक्तीचे नाव आहे. याप्रकरणी ३२ वर्षीय व्यक्तीने एसीबीकडे तक्रार केली आहे. एसीबीने दिलेल्या माहितीनुसार, तक्रारदार यांच्या विरुद्ध देहूरोड विभागाचे सहाय्यक पोलिस आयुक्त पाटील यांच्याकडे कात्रज-कोंढवा बायपास रस्त्यावरील एका जागेसंबंधात फसवणुकीचा तक्रार अर्ज दाखल आहे. या तक्रार अर्जाची चौकशी पाटील यांच्याकडे सुरू होती.

त्या तक्रारअर्जामध्ये तक्रारदार यांच्यावर फसवणुकीचा गुन्हा दाखल न करण्यासाठी व मदत करण्यासाठी पाच लाख रुपयांची लाच मागण्यात आली होती. पाटील यांच्या सूचनेवरून जाधव याने पाच लाख रुपयांची लाच मागितली, असे तक्रारदार यांनी केलेल्या तक्रारीत नमूद आहे. लाचेचा पहिला हप्ता म्हणून एक लाख रुपये स्वीकारताना एसीबीने जाधव याला अटक केली आहे.

या प्रकरणी कोरेगाव पोलिस ठाण्यात गुन्हा दाखल करण्याची प्रक्रिया सुरू आहे. विभागाचे पोलिस उपअधीक्षक नितीन जाधव, पोलिस निरीक्षक प्रसाद लोणारे, सहाय्यक पोलिस फौजदार मुकुंद अयाचित, पोलिस हवालदार चंद्रकांत जाधव, पोलिस शिपाई दिनेश माने यांनी ही कारवाई केली.