पुणे : राजकीय सभांमध्ये आवेशानं ओरडून भाषण करण्याची उपमुख्यमंत्री देवेंद्र फडणवीस यांची सवय अखेर बंद झाली आहे. त्यांची ही खोड मोडण्यासाठी अभिनेते नाना पाटेकर कारणीभूत ठरले आहेत. याचा किस्सा स्वतः फडणवीसांनी पुण्यात नाम फाऊंडेशनच्या कार्यक्रमात बोलताना सांगितला आहे.

फडणवीस म्हणाले, "पूर्वीच्या काळी मला फार आवेशानं भाषण देण्याची सवय होती. माझं भाषण झालं की पाचव्या मिनिटाला नानांचा मला फोन यायचा आणि ते म्हणायचे देवेंद्र बोललास चांगला पण असा बोलशील तर हार्टअॅटॅक येईल, जरा शांत बोल ना. असं करुन करुन माझी भाषणाची जी स्टाईल आहे, ती बदलवणारे नाना आहेत. आज मी जे शांतपणे तुम्हाला बोलताना दिसतो, ते नानांमुळं दिसतो"

नाम फाऊंडेशनसाठी नाना पाटेकर आणि मकरंद अनासपुरे हे काम करत आहेत. यासाठी त्यांनी जी टीम तयार केली आहे. त्यात असे अनेक लोक आहेत जे टीम म्हणून काम करत आहेत. यासंपूर्ण टीमचं आणि या टीमशी जोडलेल्या सर्वांचं मी मनापासून अभिनंदन करतो. त्याचबरोबर नानांनी मला नाम फाऊंडेशनचा कार्यकर्ता म्हणून कोणतीही अडचण आली तर फोन करावा असं आवाहनही त्यांनी यावेळी केलं.