हडपसर : देशातील पारंपरिक व पौष्टीक अन्नधान्य वेगाने उपेक्षित होऊ लागले आहे. त्याचे संवर्धन आणि विकास करण्यासाठी उत्पादक शेतकऱ्यांबरोबरच अन्नधान्याला वेगवेगळ्या पध्दतीने रूची आणणाऱ्या शेफनेही योगदान दिले पाहिजे. त्यांच्या पाककृतीमध्ये अशा पौष्टीक, पारंपरिक व देशी अन्नधान्याचा जाणीवपूर्वक समावेश होण्याची गरज इंडियन फेडरेशन ऑफ कूलिनरी असोसिएशनचे अध्यक्ष व प्रसिद्ध शेफ मनजीतसिंग गिल यांनी व्यक्त केली.

स्वातंत्र्याच्या अमृत महोत्सवानिमित्त मांजरी बुद्रुक येथील राष्ट्रीय द्राक्ष संशोधन केंद्राने व्याख्यानमाला सुरू केली आहे. त्यामध्ये प्रसिद्ध शेफ मनजीतसिंग गिल यांनी 'पीक - शेफ - ग्राहक यांचा अनंत संबंध' या विषयावर व्याख्यान दिले, त्यावेळी ते बोलत होते.

शेफ मनजीतसिंग म्हणाले, "योग्य हंगामात योग्य फळे आणि भाज्यांची उपलब्धता जाणून घेण्यासाठी शेफने शेतकरी आणि पीक शास्त्रज्ञांशी संपर्क साधान्याची आवश्यकता आहे.

"लाल भेंडी", "काळा तांदूळ" आणि ‘लाल मका  सारखी पारंपारिक पिके पाककृतींमधून लुप्त होवू नये यासाठी देशात खाद्यपदार्थाचा महोत्सव साजरा केला जावा. पौष्टिकदृष्ट्या संपन्न “राजगिरा” किंवा “अमरंथ” हे आपल्या पाककृतीचा एक भाग असावा. ‘शेतकरी,  संशोधक आणि शेफ जेव्हा सोबत काम करतील तेंव्हाच सुदृढ राष्ट्र निर्मिती शक्य आहे.'

या ऑनलाइन कार्यक्रमामधे देशातील शेफ, कृषिशास्रज्ञ, विद्यार्थी, शेतकरी आदी विविध क्षेत्रातील मान्यवरांनी सहभाग घेतला होता. राष्ट्रीय द्राक्ष संशोधन केंद्राचे संचालक डॉ. आर. जी. सोमकुंवार, आदी यावेळी उपस्थित होते. कार्यक्रमाचे सूत्रसंचालन संस्थेच्या वरिष्ठ शास्रज्ञ डॉ. अनुराधा उपाध्याय यांनी केले तर, डॉ. सुजॉय सहा यांनी आभार मानले.