पुणे - महाराष्ट्र औद्योगिक विकास महामंडळाने (एमआयडीसी) हिंजवडी येथील कचरा व्यवस्थापन प्रकल्पाच्या उभारणीसाठी पाच एकर जागा उपलब्ध करून दिली आहे. या जागेच्या मंजुरीबाबतचे पत्र सोमवारी जिल्हा परिषदेला दिले. हिंजवडीतील प्रकल्प देशातील कचरा व्यवस्थापनाचे उत्तम मॉडेल म्हणून विकसित करणार असल्याचे पुणे जिल्हा परिषदेचे मुख्य कार्यकारी अधिकारी आयुष प्रसाद यांनी आज सांगितले. 

पुण्याच्या बातम्या वाचण्यासाठी येथे ► क्लिक करा

पुणे जिल्ह्यातील गावांमध्ये शहराप्रमाणेच मोठया प्रमाणात कचरा समस्या भेडसावत आहे. यावर कायमस्वरूपी मार्ग काढण्यासाठी ग्रामस्थ आणि लोकप्रतिनिधींच्या समन्वयातून गावनिहाय सूक्ष्म नियोजन आराखडे तयार केले आहेत. यामध्ये आपापल्या गावातील कचरा व सांडपाण्याचे व्यवस्थापन करण्यावर भर दिला आहे. त्यामुळे गावागावांतील कचऱ्याची समस्या सोडविता येणार असल्याचेही प्रसाद यांनी स्पष्ट केले. 

ताज्या बातम्यांसाठी डाऊनलोड करा ई-सकाळचे ऍप

हिंजवडी (ता. मुळशी) येथे हिंजवडी, माण, म्हाळुंगे या तीन प्रमुख गावांसह आजूबाजूच्या गावांतील कचरा व्यवस्थापनासाठी प्रकल्प उभारला जाणार आहे. यानुसार गावस्तरावर कचरा संकलन, त्याचे व्यवस्थापन केले जाणार आहे. दरम्यान, आयुष प्रसाद यांनी आज हिंजवडी येथे हिंजवडी, माण व म्हाळुंगे येथील नियोजित घनकचरा व्यवस्थापनबाबतचा आढावा घेतला. या वेळी जिल्हा परिषद सदस्य शंकर मांडेकर, जिल्हा परिषदेच्या पाणीपुरवठा व स्वच्छता विभागाचे उपमुख्य कार्यकारी अधिकारी मिलिंद टोणपे, महाराष्ट्र औद्योगिक विकास महामंडळ आणि पुुणे महानगर क्षेत्रविकास प्राधिकरणाचे वरिष्ठ अधिकारी, क्रेडाईचे प्रतिनिधी आणि तिन्ही गावातील ग्रामस्थ उपस्थित होते.