पुणे : राज्यातील सध्याच्या परिस्थितीवर राष्ट्रवादीचे सर्वोसर्वा शरद पवार यांनी भाष्य केलं आहे. विरोधकांकडून वारंवार राष्ट्रपती राजवट लागू करण्याची धमकी दिली जात असल्याचं त्यांनी सांगितलं. तसेच जर खरंच निवडणुका लागल्या तर निकाल काय असेल हे कोल्हापूरच्या निकालानं स्पष्ट केलंय, असं पवार यांनी म्हटलं आहे. पुण्यात पत्रकारांशी ते बोलत होते.

पवार म्हणाले, राज्यात राष्ट्रपती राजवट लागू करण्याच्या धमक्या कायम दिल्या जात आहेत. पण यामुळं काहीही फरक पडणार नाही. जर निवडणुकांची स्थिती निर्माण झाली तर निकाल काय असेल हे कोल्हापूरच्या पोटनिवडणुकीनं दाखवून दिलं आहे.

सत्ता येते आणि जाते त्यामुळं याची चिंता करण्याची गरज नाही. पण काही लोक उगाचच चिंताग्रस्त होतात. मी त्यांना दोष देणार नाही. कारण राज्यातील २०१९ च्या विधानसभा निवडणुकीपूर्वी आम्ही पुन्हा सत्तेत येऊ असा दावा करण्यात आला होता. पण हे होऊ शकलं नाही आणि यामुळंच ते चिंताग्रस्त झाले आहेत, अशा शब्दांत शरद पवारांनी देवेंद्र फडणवीस आणि भाजपला टोला लगावला.